भक्तपुर । भक्तपुरको चाँगुनारायण नगरपालिकामा संचालित ‘चाँगुनारायण सिटी, एभोकाडो सिटी अभियान’ अन्तर्गत तेस्रो चरणको वृक्षारोपण शुरु भएको छ ।
चाँगुनारायण-८ चरेलीमा एभोकाडोको बिरुवा वितरण गर्दै तेस्रो वर्षको वृक्षरोपण शुरु भएको हो ।
सो अवसरमा चाँगुनारायण-८ का वडाध्यक्ष जनक खत्रीले एभोकाडो जस्तो बहुगुणी फलको शहर बनाउने बौद्धिक नेता डिपी ढकालको परिकल्पना साकार बन्दै गइरहेको बताए ।
“नगरपालिकाको जनप्रतिनिधिहरुले पनि यो अभियानको प्रशंसा गर्नुभएको छ, स्थानीय जनताको लागि भोलिको दिनमा एभोकाडो आम्दानीको श्रोत बन्नसक्छ ।” नगरपालिकाको प्रवक्ता समेत रहेका खत्रीले भने ।
अभियान अन्तर्गत अघिल्ला दुई वर्षमा गरी १८ हजार ३ सय एभोकाडोको बिरुवा वितरण र रोपण कार्य सम्पन्न भएको अभियानका संयोजक नरेश खड्काले जनाएका छन् ।
“तीन वर्षसम्म्ममा प्रत्येक घरमा दुई बोट एभोकाडो रोप्ने हाम्रो अभियान यो वर्ष अन्त्य हुनेछ ।” उनले भने ।
आगामी वर्ष भने बिरुवा हुर्काउन, फल फलाउन र फलेका फलको बजारीकरण गर्नमा ध्यान दिने अभियन्ता रामकुमार तामाङ बताउँछन् ।
स्थानीय अभियन्ता राजेश नेपालको समन्वयमा वडा नम्बर ८ मा सम्पन्न बिरुवा वितरण कार्यक्रममा ४ सय बोट एभोकाडो र केही चापका बिरुवा समेत वितरण गरिएको अभियन्ता दिनेश खनालले बताए ।
स्थानीय अभियन्ताहरु गोविन्दबहादुर नेपाल, जीतबहादुर नेपाल, रामकुमार बुढाथोकी, राजेन्द्र तिमिल्सिना, हरिशरण तिमिल्सिना, राजेन्द्र तिमिल्सिना लगायतले बिरुवा वितरणमा सहजीकरण गरेका थिए ।
कार्यक्रममा चाँगुनारायण सिटी एभोकाडो सिटी अभियानका परिकल्पनाकार एवं संरक्षक डिपी ढकालले पहिलो वर्ष रोपिएका एभोकाडोले फल दिन थालिसकेको देख्दा अभियानको क्रममा गरिएको दु:ख बिर्सिएको बताए ।
अभियानले चाँगुनारायणका प्रत्येक घरमा एभोकाडो बिरुवा पुर्याउने प्रष्ट पार्दै उनले प्रत्येक घरले एभोकाडो बेचेर वार्षिक कम्तिमा २० देखि ५० हजार रुपैयाँसम्म आम्दानी भित्राउने अपेक्षा गरे ।
“हाम्रो अभियानले चाँगुनारायणबासीलाई वार्षिक ४ करोड कमाउने सामर्थ्य दिलाएको छ” अर्थराजनीतिका ज्ञाता समेत रहेका ढकालले भने, “हामीलाई उत्पादित एभोकाडो उचित मूल्यमा खरिद गरिदिने उद्योग वाणिज्य महासंघका पूर्व अध्यक्ष लगायत सहभागी वृद्धि समूहले आश्वासन समेत दिएको छ ।
नेकपा माओवादी केन्द्रका केन्द्रीय सदस्य समेत रहेका नेता ढकालले यो अभियान राजनीतिक अभियान नभई चागुनारायण नगर क्षेत्रको पर्यावरण, स्वास्थ्य र आर्थिक समृद्धिसंग जोडिएको प्रभावकारी अभियान भएको बताएका छन् ।
सो अवसरमा संविधान सभा सदस्य उमा कपाली, वडा नम्बर ८ का पूर्व वडाध्यक्ष परासर सापकोटा,बामपंथी नेता श्रीराम खाइजु अभियन्ताहरु सुनिल बासु, चण्डीका लामिछाने, सुमन दाहाल, मदन ढुङ्गाना, जगन्नाथ खत्री, हरिश लामिछाने, राजन तिमल्सिना लगायतको उपस्थिति रहेकोे अभियन्ता दिनेश खनालले जानकारी दिए ।
तेस्रो चरणको वृक्षारोपण शुभारम्भ कार्यक्रमको संचालन भने अभियन्ता नवराज काफ्लेले गरेका थिए ।
अभियान अन्तर्गत एभोकाडोको थप बिरुवा वितरण कार्यक्रम मंगलबार बिहान साढे ७ बजे वडा नम्बर ४ मंगलटारमा हुने अभियानका प्रवक्ता संजीप घिमिरे शुभचिन्तकले जनाएका छन् ।
