काभ्रेपलान्चोक । काभ्रेको चौकीडाँडा लगायतका दर्जन बढी स्थानमा रोशी खोलाले सडक कटान गर्नुकासाथै गत वर्ष बनाएको पुरानो डाइभर्सन बगाएपछि बिपी राजमार्ग अवरुद्ध भएको छ ।
चौकीडाँडा देखि नेपालथोक सडक खण्डमा राजमार्ग अवरुद्ध भएको हो ।
अवरुद्ध सडक सुचारुको लागि सोमबारबाट डाइभर्सन बनाउन प्रयास भैरहेको सडक डिभिजन भक्तपुरले जनाएको छ । डिभिजन प्रमुख सुमन योगेशले दिएको जानकारी अनुसार प्राविधिक टोलिले डाइभर्सन बनाउन प्रयास गरिरहेका छन् ।
रोशीको बहाव घट्दो क्रममा रहेकोले डाइभर्सन बनाउन प्रयास भैरहेको उनले बताए । प्रमुख योगेशले बताए अनुसार गत वर्ष बनाएका डाइभर्सन सबै बगेका छन् ।
दुई तीन दिनमै सडक सुचारु गर्ने सडक डिभिजनले तयारी गरेको भएपनि गत वर्षको अनुभवका आधारमा कम्तिमा एक साता लाग्न सक्ने स्थानीयले अनुमान गरेका छन् ।
बिपी राजमार्गको नेपालथोक- चौकी डाँडा खण्ड अवरुद्ध भएपनि पूर्वबाट आउने यात्रीहरु खुर्कोटबाट रामेछाप,दोलखा हुँदै धुलिखेल जोडिने बैकल्पिक मार्ग प्रयोग गरिरहेका छन् ।
