सांसद राजन दाहाल दुलोमा लुकेको अभिव्यक्ति दिएर उनैसंग कफी पिउन नेकपा(एमाले) का नेता महेश बस्नेत पुगेपछि भक्तपुरको राजनीति तरंगित बन्न पुगेको छ । शनिवार सूर्यविनायक-८ को एमाले वडा अधिवेशनमा ”खै कुन दुलोमा लुकेको छ राजन दाहाल ?” भन्दै प्रश्न गरेका एमाले जिल्ला इन्चार्ज महेश बस्नेत केही बेरमै दाहालसंग कफी पिउन पुगेपछि जिल्लाको राजनीति तरंगित बनेको हो ।
प्रधानमन्त्री समेत रहेका एमाले अध्यक्ष केपी शर्मा ओलीमाथि संसदमा प्रश्न उठाएका दाहालको आलोचना गर्दै शनिवार बस्नेतले पशुपतिको जलहरीमा सुन नभई पित्तल हालिएको हल्ला फैलाएर राजन दाहाल दुलोमा लुकेको बताएका थिए । त्यसको केही घन्टामै दुई नेताले एउटै टेबलमा कफी पिएको फोटो सार्वजनिक भयो । भक्तपुर र सिन्धुलीका एमाले तथा माओवादी दुवै दलका कार्यकर्ताका लागि यो एउटा आश्चर्यजनक खबर बन्न पुगेको छ ।
सत्तारुढ दल नेकपा (एमाले) को पोलिटब्युरो सदस्य बस्नेत पूर्व उद्योग मन्त्री समेत हुन् भने दाहाल प्रमुख प्रतिपक्षी दल नेकपा(माओवादी केन्द्र) का केन्द्रीय सदस्य एवं संघीय सांसद रहेका छन् । भक्तपुरका नेता बस्नेत र सिन्धुलीका नेता दाहाल दुवै लडाकु स्वभावका नेता मानिन्छन । आफ्ना बिरोधिलाई देखि नसहने समान प्रवृत्तिका बस्नेत र दाहाल दुवै एक अर्कालाई गाली गर्ने अवसर चुकाउँदैनन् । यि दुई नेताबीचका बिबाद संचार माध्यमका लागि मसला बन्ने गरेका छन् ।
विशेषत: २०६६ सालमा सिन्धुलीको सुनकोशीमा बस्नेत नेतृत्वमा रहेको युवा संघको समूह र दाहाल नेतृत्वमा रहेको माओवादीको समूह बीच भिडन्त भएको घटनाले पनि यि दुई नेताहरुलाई मिल्न दिएको देखिंदैन । दाहालको नजरमा बस्नेत राजनीतिक नेता भन्दा बढी नवमण्डले र गुण्डा नाइके हुन् भने बस्नेतको नजरमा दाहाल अराजक र अपराधी पनि । नेता बस्नेतले त आफ्ना कार्यकर्तालाई सार्वजनिक सम्बोधन गर्दै राजन दाहाल जेलको कालकोठरीमा जाने ठोकुवा नै गरेका छन् । ”राजन दाहाल जेलको कालकोठरीमा एक जान्छन, दुई जान्छन, तीन जान्छन ।” बस्नेतले सार्वजनिक रुपमै ठोकुवा गरेका हुन् ।
तर, राजनीतिमा जे हुन्छ त्यो भनिदैँन र जे भनिन्छ त्यो हुँदैन भन्ने आम धारणालाई सहि सावित गर्दै यि दुई झगडिया नेताले मित्रताको हात अघि बढाएका छन् ।
बस्नेत र दाहाल बीच भेटघाटको तारतम्य भने वाइसिएलका भक्तपुर जिल्ला इन्चार्ज नरेश रन्जितले मिलाएका हुन् । रन्जित दुवै नेताका बिश्वासपात्र मानिन्छन् । रन्जितको कौसलटारस्थित निवासमा दुई नेताले मित्रताको हात अघि बढाउँदा नेकपा(एमाले)का जिल्ला अध्यक्ष बचन देउजा, एमाले नेता चन्दनकृष्ण श्रेष्ठ, युवा संघका केन्द्रीय सदस्य विशाल सुवेदी र वाइसिएलका केन्द्रीय सदस्य राजु कुटु लगायतका नेताहरु साक्षी बन्न पुगेका थिए ।
लामो तिक्ततापूर्ण सम्बन्धमा रहेका दुवै नेताले आफूहरुको भेट आकस्मिक र अनौपचारिक भएको बताएका छन् । यद्यपी, दुवै नेताहरु तितो सम्बन्ध त्याग्न आतुर रहेका देखिएको छ ।
सो भेटमा आपसी सम्बन्ध र समसामयिक राजनीतिका विषयमा छलफल पनि भएको नेताद्वयले स्वीकार गरेका छन् । राजनीतिमा स्थायी शत्रु नहुने भन्दै उनीहरुले आफूहरुको शत्रुता परिस्थितिजन्य मात्र भएको र अब त्यसमा सुधार गर्दै अघि बढ्ने अठोट गरेका मध्यस्थकर्ता बनेका युवा नेता एवं सामाजिक अभियन्ता नरेश रन्जितले जानकारी दिए ।
युवाहरुको समूह परिचालनमा पोख्त बिपरित धारका बस्नेत र दाहालको मित्रता धेरैको लागि अविश्वसनीय र टाउको दुखाइको विषय समेत बनेको देखिएको छ । सामाजिक संजाल हेर्दा यि दुई नेताको मिलनबारे मिश्रित प्रतिक्रिया प्राप्त भएको छ । धेरैजसो कार्यकर्ताले युवा नेताहरु गाली र बदलाको राजनीति बिर्सेर बामपन्थी एकता र बिकासका योजनामा केन्द्रीत हुनुपर्ने सुझाव दिएका छन् भने कतिपयले संयोगको भेटले वर्षैदेखि बिग्रेको सम्बन्ध नसुध्रने जिकिर गरेका छन् ।
नेताद्वयले भने अर्को बैठक समेत निश्चित गरी मित्रताको हात अघि बढाईसकेका बताइएको छ । तल जुधाएर माथि टाउको जोड्ने नेताहरुको चरित्र जति छिटो बुझ्यो बिपरित पार्टीका कार्यकर्ताबीचको द्वन्द्व समेत त्यति नै छिटो समाप्त हुने देखिन्छ ।
