काठमाडौँ । २०औँ एसियाली खेलकुदअन्तर्गत महिला भलिबलतर्फ आफ्नो पहिलो खेलमा नेपाल आयोजक जापानसँग पराजित भएको छ ।
जापानको कोमाकीस्थित पार्क एरेनामा बुधबार भएको खेलमा नेपाल जापानसँग ३–० को सोझो सेटमा पराजित भएको हो । जापान पहिलो सेटमा २५–०८, दोस्रो सेटमा २५–१२ र तेस्रो सेटमा २५–११ मा विजयी भयो ।
एसियाली महादेशको भलिबल पावर हाउस मानिने बलियो टोली जापानसामु नेपाल निरीह देखियो । घरेलु समर्थकको साथ पाएको जापानले भने आफ्नो दबदबालाई कायम राख्यो ।
नेपाल रहेको समूह ‘ए’मा जापान र इन्डोनेसिया छन् । अब नेपालले भोलि इन्डोनेसियासँग खेल्नेछ । प्रतियोगितामा सहभागी १४ टोलीलाई चार समूहमा विभाजन गरिएको छ । समूहका शीर्ष दुई टोलीले क्वाटर फाइनलमा स्थान बनाउनेछन् । स्वर्ण पदकको लागि असोज ६ गते प्रतिस्पर्धा हुनेछ ।
