काठमाडौं, १४ साउन । प्रधानमन्त्री तथा मन्त्रिपरिषद्को कार्यालयमा निर्माण अत्याधुनिक ‘एक्सन रुम’ निर्माण गरिएको छ । अहिले उक्त एक्सन रुमका लागि विभिन्न सीसी क्यामेराहरु जडान गर्ने काम भइरहेको छ ।
यो एक्सन रुमबाट प्रधानमन्त्रीले खासगरी राष्ट्रिय गौरवका आयोजनाहरूको अनुगमन गर्ने बताइएको छ । एक्सन रुममा ‘स्थलगत अनुगमन प्रणाली (आईपी क्यामेरा) जडान गरिन थालिएको छ । क्यामरा जडान गरेपछि एक्सन रुम सञ्चालनमा ल्याउने कार्य अन्तिम चरणमा पुग्ने बताइएको छ ।
एक्सन रुम सञ्चालन भएपछि प्रधानमन्त्रीले त्यही रुममा बसेर देशभरका राष्ट्रिय गौरवका आयोजनाको अवलोकन गर्नेछन् । प्रत्यक्ष अवलोकनमार्फत विकास आयोजनालाई थप तीव्रता दिन राष्ट्रिय गौरवका ११ वटा आयोजनामध्ये सातवटामा सो प्रणाली जडान गरी सञ्चालनमा ल्याइएको प्रधानमन्त्री तथा मन्त्रिपरिषद्को कार्यालयले जनाएको छ ।
मन्त्रिपरिषद् कार्यालयका प्रवक्ता विनोदबहादुर कुँवरले राष्ट्रिय गौरवका आयोजनाहरूमा स्थल अनुगमन प्रणाली जडान तथा सञ्चालन गर्ने कार्य अन्तिम चरणमा पुगेको जानकारी दिए । कुँवरका अनुसार राष्ट्रिय गौरवका ११ वटा आयोजनामध्ये बाँकी तीनवटामा सो प्रणाली जडान कार्य सम्पन्न भइसके पनि नेटवर्किङ समस्याका कारण सञ्चालनमा आउन सकेको छैन । ती आयोजनामध्ये राष्ट्रपति चुरे संरक्षण आयोजनामा सो प्रणाली अझै जडान हुन सकेको छैन ।
प्रधानमन्त्री केपी शर्मा ओलीले असार २६ गते प्रधानमन्त्री कार्यालयमा निर्माण गरिएको ‘एक्सन रुम’बाट सो प्रणाली जडान भएका आयोजनाको पहिलो पटक अवलोकन गरे । यसअघि प्रधानमन्त्री ओलीले जेठ १५ गते सातवटै प्रदेशका मुख्यमन्त्रीसँग भिडियो संवाद गरी ‘एक्सन रुम’ उद्घाटन गरेका थिए ।
‘एक्सन रुम’ सञ्चालनसँगै मुलुकका विकास आयोजनाले थप गति लिनुका साथै कुनै विषयमा प्रधानमन्त्रीसँग छलफल गर्नका लागि मुख्यमन्त्री काठमाडौँ आउनुपर्ने बाध्यता अन्त्य भएको प्रवक्ता कुँवरले जानकारी दिए। सिंहदरबारमै बसेर प्रधानमन्त्रीले सिक्टा सिँचाइ आयोजना, भेरी–बबई डाइभर्सन, मेलम्ची खानेपानी आयोजना, गौतम बुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थलमा भइरहेका कार्यको अवलोकन गरेका थिए ।
प्रधानमन्त्री तथा मन्त्रिपरिषद् कार्यालयका अनुसार भेरी–बबई डाइभर्सन बहुउद्देश्यीय आयोजनामा छ, सिक्टा सिँचाइ आयोजनामा चार, रानी जमरा कुलरिया सिँचाइ आयोजनामा तीन, हुलाकी राजमार्ग र पुष्पलाल मध्यपहाडी लोकमार्गमा एक–एकवटा तथा गौतमबुद्ध अन्तर्राष्ट्रिय विमानस्थलमा पाँचवटा ‘आईपी क्यामेरा’ जडान गरिसकिएको छ ।
