ललितपुर । नेकपा एमालेको महाधिवेशनमा नेतृत्व चयनका लागि मतदान भइरहेकै समयमा एमाले अध्यक्ष केपी शर्मा ओलीको निजी निवास रहेको भक्तपुरस्थित बालकोटकै एमाले नेता तथा कार्यकर्ताहरू नेपाली कम्युनिस्ट पार्टीमा प्रवेश गरेका छन् ।
भक्तपुरको बालकोट–२ वडाबाट एमालेका नेता तथा कार्यकर्ताहरू आज नेपाली कम्युनिस्ट पार्टीको एकता अभियानमा सहभागी भएका हुन्। नेकपा संयोजक प्रचण्डले उनीहरूलाई पार्टी प्रवेश गराएका हुन् ।
पार्टी प्रवेश गर्नेहरुमा एमाले बालकोटका नेता तथा वडा २ का अध्यक्षका उम्मेदवार रवि श्रेष्ठ, नेपाल–कोरिया मैत्री अस्पतालका मेडिकल सुपरिटेन्डेन्ट डा. डिके रोसन तथा सूर्यविनायक क्षेत्रका ईश्वर सिलवाल, हरि बास्कोटा, भाइकृष्ण श्रेष्ठ, अमृत सिलवाल, कृष्ण सिलवाल, विकास खत्री, दीपक खत्री, धुर्व के.सी., रुकुश वेकाजु, सुदिप प्रजा र कृष्णशरण लामिछाने रहेका छन्।
यस घटनाले भक्तपुर एमालेभित्र लामो समयदेखि रहँदै आएको असन्तोष सतहमा आएको छ।
बालकोट एमाले शक्ति केन्द्रका रूपमा चिनिँदै आएको क्षेत्र हो। त्यही क्षेत्रबाट, त्यो पनि महाधिवेशनको निर्णायक घडीमा भएको पार्टी परित्यागले नेतृत्वप्रति बढ्दो असन्तुष्टि, संगठनात्मक असहजता र कार्यकर्ता तहमा देखिएको निराशालाई उजागर गरेको छ।
मतदान प्रक्रियाले पार्टी एकताको सन्देश दिन खोजिरहँदा बालकोटबाटै देखिएको यो राजनीतिक बहिर्गमनले एमालेभित्रको वास्तविक अवस्था प्रश्नको घेरामा पारेको छ।
पार्टी प्रवेश गर्नेहरू स्थानीय तहमा प्रभाव राख्ने, निर्वाचनमा सक्रिय भूमिका खेलिसकेका र संगठन निर्माणमा संलग्न नेता–कार्यकर्ता हुन्। यसले देखाउँछ कि असन्तोष केवल माथिल्लो तहमा सीमित छैन, तहसम्म फैलिएको छ।
नेतृत्व चयनका प्रक्रियामा चलिरहँदा एमालेबाट बाहिरिने निर्णय गर्नु आफैंमा राजनीतिक असन्तोषको संकेत हो।
नवप्रवेशीहरूलाई पार्टी संयोजक प्रचण्डले स्वागत गर्नु पनि अर्थपूर्ण छ। नेपाली कम्युनिस्ट पार्टीले यसलाई केवल संख्या वृद्धिको रूपमा होइन, एमालेभित्रको असन्तुष्टि समेट्ने राजनीतिक अवसरका रूपमा उपयोग गर्न खोजेको देखिन्छ।
एकता अभियानमार्फत असन्तुष्ट कम्युनिस्ट शक्तिलाई गोलबन्द गर्ने रणनीति यस घटनाबाट अझ स्पष्ट बनेको छ।
समग्रमा, एमाले महाधिवेशनको मतदान र बालकोटबाट भएको पार्टी प्रवेश एउटै राजनीतिक समयरेखामा जोडिएका दुई फरक तर आपसमा अन्तरसम्बन्धित घटना हुन्।
एकातिर नेतृत्व वैधता पुष्टि गर्ने प्रक्रिया चलिरहँदा अर्कोतिर त्यसै नेतृत्वको आधार क्षेत्रबाटै आएको बहिर्गमनले एमालेभित्रको एकता, नेतृत्व शैली र संगठनात्मक भविष्यबारे गम्भीर प्रश्न उठाएको छ।
पार्टी प्रवेशबाट नेपाली कम्युनिस्ट पार्टी भक्तपुरका नेताकार्यकर्ता उत्साहित रहेका छन् ।
नवप्रवेशी नेता तथा कार्यकर्ताहरूलाई पार्टी संयोजक प्रचण्डले टीका र खादा लगाएर पार्टीमा स्वागत गरे। उनले कम्युनिस्ट आन्दोलनलाई थप सशक्त बनाउँदै समाज परिवर्तन र जनताको पक्षमा दृढतापूर्वक अघि बढ्न नेपाली कम्युनिस्ट पार्टीमा गोलबन्द हुन आह्वान गरे।
पार्टीमा प्रवेश गरेका नेताहरूले नेपाली कम्युनिस्ट पार्टीको नीति, विचार र नेतृत्वप्रति विश्वास व्यक्त गर्दै पार्टीलाई अझ मजबुत बनाउन सक्रिय भूमिका खेल्ने प्रतिबद्धता जनाएका मध्यपुर थिमिका उपमेयर समेत रहेका नेपाली कम्युनिस्ट पार्टीका नेता बिजयकृष्ण श्रेष्ठले बताएका छन् ।
