नेपाली काँग्रेस भक्तपुरका सभापति एवं प्रतिनिधि सभा सदस्य दुर्लभ थापाले नेताहरुको आर्थिक हैसियत बढेको कुरा बताएका छन् । नेताको आर्थिक हैसियत बढ्नु तर, जनताको आर्थिक अवस्था कमजोर हुनु बिडम्बना भएको उनले बताए ।
शनिवार कटुन्जेमा आयोजित लौहपुरुष गणेशमान सिंहको ११० औं जन्मजयन्ती समारोहमा बोल्दै सांसद थापाले सर्वमान्य नेता गणेशमान सिंहले प्रजातन्त्र प्राप्तिपछि राजनीतिक क्रान्ति सकिएको र अब आर्थिक क्रान्ति गर्नुपर्ने उद्घोष गरेका भएपनि त्यो हुननसकेको प्रति दुख व्यक्त गरे ।
नेताको आर्थिक प्रगति बढेको तर जनतामा भने निराशा मात्र बढेको उनले बताए ।”नेताको आर्थिक उन्नति भयो, जनताको भागमा निराशा मात्र रह्यो ।” उनले भने ।
उनले प्रत्येक निराश जनतामा आशाको संचार गर्नुपर्ने दायित्व काँग्रेसले बोक्नुपर्ने पनि बताए । समस्या मात्र खोतल्ने नभई समस्याको समाधान दिनुपर्ने भन्दै सांसद थापाले सर्वसाधारण जनताका समस्या र गुनासा बढाउनेमा नभई समाधानका उपाय खोज्न आफ्ना कार्यकर्तालाई निर्देशन समेत दिए ।
प्रजातन्त्रको पुनर्बहालीका लागि आन्दोलनको कमान्डर रहेका गणेशमानले प्रजातन्त्र प्राप्तिपछि प्राप्त प्रधानमन्त्री बन्ने अफर त्यागेर आफ्ना समकक्षी कृष्ण प्रसाद भट्टराई लाई अघि सारेको स्मरण गर्दै उनले त्यो त्याग र आदर्श हरेक काँग्रेस नेताकार्यकर्तामा हुनुपर्ने आवश्यकता पनि औल्याए ।
कार्यक्रममा उनले आफूलाई बिकास बिरोधी भनेर भ्रम छर्ने विपक्षीहरुले बिकासका नाममा भद्रगोल सिर्जना गरेका र भ्रष्टाचारमा लिप्त भएका आरोप लगाएका थिए ।
कार्यक्रममा नेपाली काँग्रेसका केन्द्रीय सदस्य बलबहादुर केसीले गुट उपगुटमा बाडिन पुगेको काँग्रेसले गणेशमान वाट सिक्नुपर्नेमा जोड दिए । गणेशमानले कोही व्यक्ति विशेषलाई आफ्नो नजिक नबनाएका र सबै काँग्रेसजनलाई उत्तिकै स्नेह गरेका उनले स्मरण गरे ।
सो अवसरमा गणेशमान स्मृति बाटिकाका अध्यक्ष माथवरसिंह बस्नेतले श्रद्धा मन्तब्य राखेका थिए भने कार्यक्रमको संचालन यादव प्रसाद अधिकारीले गरेका थिए । कार्यक्रममा केन्द्रीय सदस्य मदन कृष्ण श्रेष्ठ, प्रदेश, जिल्ला र नगर समितिका पदाधिकारी, चाँगुनारायण नगरपालिकाका प्रमुख जीवन खत्री, पूर्व मन्त्री कृष्णलाल भडेल, अग्रज नेता कविर राणा लगायतको उपस्थिति रहेको थियो ।
सहभागीहरुले लौह पुरुष गणेशमान सिंहको शालिकमा माल्यार्पण गर्नुका साथै प्रजातान्त्रिक आन्दोलनमा उनको योगदानको स्मरण गरेका थिए ।
