बुद्धशरण शाही/काठमाडौ । प्रथम उपमेयर कप उपत्यकाव्यापी अन्तरपालिका एकायन कराँते प्रतियोगिता शुरू भएको छ । काठमाडौको लैनचौरस्थित राष्ट्रिय टेबल टेनिस प्रशिक्षण केन्द्रको कभर्ड हलमा प्रतियोगिता शुरु भएको हो ।
काठमाडौँ महानगरपालिकासँगको सहकार्यमा नेपाल एकायन कराँते सङ्घले आयोजना गरेको प्रतियोगिता शनिवार सञ्चार उद्यमी भाष्करराज राजकर्णीकार र रघुवीर भक्त महर्जनले संयुक्त रुपमा उद्घाटन गरेका हुन् । उनीहरुले एकायन कराँतेको बिकासका लागि सञ्चार क्षेत्रले सक्दो सहयोग पुर्याइरहेको प्रष्ट पार्दै निरन्तर सहयोग रहने प्रतिबद्धता पनि प्रकट गरेका छन् ।
प्रतियोगितामा महिलातर्फ ६ तथा पुरुषतर्फ ८ गरी कूल १४ तौल समूह रहेका र १ सय ९४ खेलाडी प्रतिस्पर्धामा उत्रिएका नेपाल एकायन कराँते सङ्घका संस्थापक अध्यक्ष श्रीकृष्ण डंगोलले बताएका छन् । यस प्रतियोगितामा काठमाडौँ महानगरपालिका भित्र सञ्चालित नेपाल एकायन कराँते सङ्घका विभिन्न शाखा तथा विद्यालय प्रशिक्षण केन्द्रहरूका खेलाडीले सहभागिता जनाएका उनले जानकारी दिए। प्रतियोगितामा दुई दिनसम्म चल्ने बताइएको छ ।
प्रतियोगितामा प्रथम , द्वितीय र तृतीय हुने खेलाडीहरुलाई नगद तथा मेडलबाट सम्मान गरिने आयोजकको भनाइ छ । समापन समारोहमा भने काठमाडौ महानगरकि उपप्रमुख सुनिता डङ्गोलको प्रमुख आतिथ्यता रहने आयोजकको भनाइ छ ।
नेपाल एकायन कराँते सङ्घ २०७२ सालमा राष्ट्रिय खेलकुद परिषदमा दर्ता भएको हो । विगतमा विभिन्न राष्ट्रिय लगायत इन्डो–नेपाल र दक्षिण एसियाली एकायन प्रतियोगिता सम्पन्न गरिसकेको बताउनुहुँदै अब आगामी पुसमा एसियाली एकायन कराँते च्याम्पियन्सीपको आयोजना गर्ने तयारी गरिरहेको संघका सल्लाहकार शशि कपालीले जनाएका छन् ।
