भक्तपुर, २० असार । नेपाल प्रहरीको महानगरीय अपराध महाशाखाको टोलीले भक्तपुरबाट दुई पाकिस्तानीलाई पक्राउ गरेको छ । चोरीको आरोपमा उनीहरुलाई पक्राउ गरिएको हो ।
पक्राउ पर्नेमा पाकिस्तानका ३२ वर्षीय मोहसीन खान र ३१ वर्षीय पूजा मोहसीन खान रहेका छन् । उनीहरुलाई शुक्रवार दिउँसो भक्तपुरको महानगरीय प्रहरी परिसर नजिकै रहेको होटल स्वीट होमबाट पक्राउ गरिएको हो ।
काठमाडौँ महानगरपालिका–२३ झोँसेमा राजेन्द्र श्रेष्ठले सञ्चालन गरेको डेभिस मेट्रो मनी एक्चेन्जमा पैसा साट्ने बहानामा नगद चोरेर फरार रहेका उनीहरु प्रहरीको फन्दामा परेका हुन् ।
गत वैशाखमा सूर्यविनायकस्थित रामकृष्ण श्रेष्ठले सञ्चालन गरेको आरके इलेक्ट्रिक एण्ड इलेक्ट्रोनिक्स सेन्टरबाट रु ३० हजार , लोकन्थलीमा शान्तकृष्ण हेकाले सञ्चालन गरेको मासु पसलबाट ७० हजार र बुटवलमा शारदा वाग्लेले सञ्चालन गरेको राइजिङ स्पोर्टसबाट रु १ लाख ५० हजार चोरी गरेको अभियोगमा पक्राउ परेका उनीहरु दुवैजना जनही ५० हजार धरौटी तिरेर यस अघि छुटेका व्यक्ति भएको प्रहरीले जनाएको छ ।
