काठमाडौं, २० असार । मिडिया काउन्सिल विधेयकमा रहेको प्रेस तथा अभिव्यक्ति स्वतन्त्रताविरोधी केही प्रावधानको संशोधनलगायतको माग राखी नेपाल पत्रकार महासंघले घोषणा गरेको तेश्रो चरणको आन्दोलनको क्रममा महासंघले आज बृहत ‘प्रेस स्वतन्त्रता सभा’ आयोजना गरेको छ ।
नागरिक अभियन्ता कृष्ण पहाडीले सरकारलाई माफियाले गाँजेका कारण सरकारले माफिया माथिको समाचार सञ्चारमाध्यममा नआओस भनेर मिडिया विरोधी विधेयक ल्याएको बताए । उनले प्रेस स्वतन्त्रता तथा अभिव्यक्ति स्वतन्त्रता आधारभूम मानवअधिकार रहेको भन्दै सञ्चारमाध्यमको दुरुपयोग हुनसक्ने तर्फ भने सबैजना सचेत हुनुपर्नेमा जोड दिए ।
नेपाल पत्रकार महासंघका अध्यक्ष गोविन्द आचार्यले महासंघले प्रेस स्वतन्त्रता विरोधि विधेयकको विरोधमा आन्दोलन गरेको दुई महिना पुग्दा समेत सम्बन्धीत निकायले महासंघको चासो तथा आन्दोलनको बारेमा सम्बोधन नगरेको बताए । उनले महासंघले रहरले नभइ जनताको अभिव्यक्ति स्वतन्त्रताको पक्षमा आन्दोलन गरेको धारणा राखेका थिए ।
प्रेस काउन्सिलका पूर्व अध्यक्ष राजेन्द्र दाहालले सरकारले ल्याएको प्रेस स्वतन्त्रता विरोधी विधेयक ल्याएर सरकारको नियत स्पष्ट भएको बताए । सरकारले सोकारवालासंग छलफल नै नगरि विधेयक ल्याएको कारण सरकार नै विबादित भएको बताए । उनले प्रेससंग सरोकार राख्ने सबै विषयबस्तुहरुमा महासंघको प्रत्यक्ष सहभागितामा गराउनुपर्ने धारणा व्यक्त गरे ।
महासंघका प्रर्व अध्यक्ष शिव गाँउलले जनताबाट चुनिएको भनिएको नेत्रित्व स्वयं विचार तथा अभिव्यक्ति स्वतन्त्रताको कुरामा मुलत पत्रकारहरुमाथि तथा आमसञ्चारमाध्यममाथि चर्को सजाय गर्ने नियतबाट आइरहेको जिकिर गरे । उनले आमसञ्चार तथा पत्रकारितमा माथि चर्को दण्ड सजाय थोपरे सरकार जनताको विचार तथा अभिव्यक्ति स्वतन्त्रता माथि नियन्त्रण गर्न खोजेको बुझिएको आरोप लगाए ।
कार्यक्रममा बोल्दै महासंघका महासचिव रमेश विष्टले नेपालमा प्रेस स्वतन्त्रता कुण्ठित गर्ने र स्वतन्त्र ढंगले पत्रकारिताको वातावरणलाई समाप्त पार्ने किसिमबाट सरकारले मिडिया सम्बन्धी विधेयक ल्याएका कारण महासंघ आन्दोलनमा उत्रिन बाध्य भएको बताए । उनले सरकारले ति विधेयक प्रेस स्वतन्त्रता मैत्री नबनाए महासंघ चौथो चरणको आन्दोलनमा जान बाध्य हुने चेतावनी दिए ।
