जनकपुरधाम । मधेश प्रदेशका मुख्यमन्त्री जितेन्द्रप्रसाद सोनार (सोनल)ले शनिबार प्रदेशसभाको बैठकमा विश्वासको मतको प्रस्ताव फिर्ता लिँदै पदबाट राजीनामा दिएका छन् ।
विश्वासको मत पारित नहुने स्थिति देखिएपछि सोनारले सभामुख समक्ष राजीनामा घोषणा गरेका हुन् । सभामुख रामचन्द्र मण्डलले त्यसपछि बैठक स्थगित गरे ।
बैठकमा एमाले र नेपाली कांग्रेसले समर्थन नदिने बताएका थिए भने माओवादी केन्द्रका केही सदस्य तटस्थ बसेका थिए। कुल १०७ सदस्य रहेको प्रदेशसभामा बहुमतका लागि ५४ मत आवश्यक पर्छ।
राजनीतिक समीकरण फेरबदलबीच सोनारको राजीनामाले मधेश प्रदेशको सत्ता समीकरण फेरि अस्थिर बनेको छ ।
