काठमाडौं । प्रमुख प्रतिपक्षी दल नेकपा माओवादी केन्द्रको सहायक संगठन वाइसीएल, नेपाल (YCL, Nepal) को तेस्रो राष्ट्रिय सम्मेलनले अध्यक्षमा पुष्प ओलीलाई निर्वाचित गरेको छ ।
शुक्रबार मित्रपार्कस्थित गोल्डेनलाइट पार्टी प्यालेसमा सम्पन्न सम्मेलनले ओलीको नेतृत्वमा ३ सय ५१ सदस्यीय नयाँ केन्द्रीय समिति निर्वाचित भएको हो ।
दाङका स्थायी बासिन्दा ओली यसअघि संगठनका उपमहासचिव थिए।
वाइसीएलको महासचिवमा कर्णाली क्षेत्रका गणेश शाही (बिद्रोही) निर्वाचित भएका निवर्तमान सचिव डिपी थपलियाले जानकारी दिए ।
कार्यसमितिको समावेशी संरचना अनुसार अन्य पदाधिकारीमा भने विभिन्न वर्ग, लिङ्ग, जात, उमेर समूह र भौगोलिक क्षेत्रको प्रतिनिधित्व हुने गरी ७१ पदाधिकारी रहेका निर्वाचन समितिका सदस्य गोविन्दबहादुर बटालाले बताए ।
पाँच दिनअघि माओवादी केन्द्रका अध्यक्ष पुष्पकमल दाहाल ‘प्रचण्ड’ले कमलादीस्थित प्रज्ञा भवनमा सम्मेलन उद्घाटन गरेका थिए। ३ दिनमा सक्ने लक्षका साथ शुरु गरिएको सम्मेलन नेतृत्व चयनमा अड्किदा थप दुई दिन लम्बिन पुगेको थियो ।
नेतृत्व चयनमा धेरै दावी परेपछि बन्द सत्रले नेतृत्व चयन गर्न मतदानको तयारी गरेको थियो। तर, अन्तिम समयमा सहमति जुटेपछि सर्वसम्मत नेतृत्व चयन गरिएको वाइसीएल स्रोतले जनाएको छ।
वाइसीएल इन्चार्ज रामप्रसाद सापकोटा ‘दीपशिखा’ले सर्वसम्मत नेतृत्व चयन भएको पुष्टि गरेका छन् ।
सम्मेलनले नयाँ नेतृत्वलाई जिम्मेवारी सुम्पँदै आगामी कार्यदिशा तय गरेको उनले बताए । अब वाइसीएल पहिलेको जस्तै शसक्त बन्ने उनले बताए ।
अब वाइसीएलले युवा सहभागिता, सामाजिक परिवर्तन र राजनीतिक जिम्मेवारीमा अझ सशक्त ढंगले भूमिका निर्वाह गर्ने नवनिर्वाचित अध्यक्ष पुष्प ओलीले प्रतिबद्धता प्रकट गरेका छन् ।
