काठमाडौँ, २५ साउन । नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले लामो संघर्ष र बलिदानपछि प्राप्त उपलब्धिलाई कसैले उल्ट्याउन नसक्ने बताएका छन् ।
शनिबार काठमाडाैंकाे बुद्धनगरमा एकीकृत अखिल नेपाल शिक्षक संगठनले अायाेजना गरेकाे उपत्यकास्तरीय संयुक्त जिल्ला परिषद तथा सम्मान कार्यक्रमलाई सम्बोधन गर्दे अध्यक्ष दाहालले जनतामा आएको राजनीतिक सामाजिक जागरण सहितको परिर्वतनलाई कसैले उल्ट्याउन नसक्ने दाबी गरेका हुन् ।
अरुदिनभन्दा बढी अाक्राेशित मुद्रामा देखिएका प्रचण्डले परिर्वतन निरन्तर अगाडि बढीरहने र पछाडि फर्किन नसक्ने भन्दै इतिहास उल्ट्याउन गरिने प्रयास र तीनका अगुवाहरु अन्ततः सबै फोहरको थुप्रोमा मिल्क्याईने बताए ।
उनले भने, “जनतामा राजनीतिक सामाजिक जागरणसहित अगाडि बढेको विद्रोह र त्यसका उपलब्धिलाई कसैले उल्ट्याउन सकेको छैन । इतिहासको चक्का निरन्तर अगाडि बढ्छ । पछाडि धकेल्न चाहनेहरु इतिहासको रछ्यानमा मिल्याईने नै गरेका छन् । नेपाल त्यसको अपवादमा हुनै सक्दैन । ”
उनले प्रतिगमनको प्रभाव नेपाली राजनीतिमा पर्न नदिनका लागि नै कम्युनिष्ट एकता गरिएको स्पष्ट पारे । उनले पुराना सोच , संरचना, मुल्य मान्यतालाई व्यवहारतः विस्थापित गरि नया सोच, मुल्य मान्यता र संस्कृति अघि बढाउने चुनौती अहिले पनि कायम रहेकाले परिर्वतनका पक्षधरहरुले नेतृत्वदायी भूमिका खेल्नुपर्ने आवश्यकता औल्याए ।
उनले मुलुकको समग्र शिक्षा प्रणालीलाई समाजवाद शिक्षा नीति अनुसार अघि बढाउनका लागि शिक्षकहरुको निकै ठुलो भूमिका रहेको भन्दै प्रभावकारी भुमिका निर्वाहका लागि आग्रह गरे ।
कार्यक्रममा शिक्षा क्षेत्रमा योगदान पुर्याएका विभिन्न व्यक्तित्व, यस वर्षकाे एसईई परीक्षामा ४ जिपिए ल्याउने विद्यार्थी र संगठनमा लामाे समय याेगदान गरेकाहरु लाई सम्मान गरिएको थियो । उद्घाटन कार्यक्रममा शिक्षा तथा विज्ञान प्रविधिमन्त्री गिरिराजमणी पाेखरेल, पूर्व शिक्षामन्त्री गंगाधर तुलाधर एकीकृत अखिल नेपाल शिक्षक संगठनका अध्यक्ष शंकर अधिकारी लगायतले सम्वाेधन गरेका थिए ।
