काठमाडौँ । नेपाली कांग्रेस केन्द्रीय कार्यसम्पादन समितिको बैठक पार्टी केन्द्रीय कार्यालय सानेपामा जारी रहेको छ।
बैठकमा पार्टीको संसदीय दलको नेताको निर्वाचन प्रक्रिया, समसामयिक राजनीतिक अवस्था तथा आगामी रणनीतिबारे गहन छलफल भइरहेको नेताहरूले जानकारी दिएका छन्।
बैठकमा विशेषगरी संसदीय दलको नेतृत्व चयनलाई प्राथमिकताका साथ उठाइएको छ। दलको नेता चयनसँगै संघीय संसदमा पार्टीको भूमिका, सरकारसँगको सम्बन्ध र प्रतिपक्षीय रणनीतिबारे स्पष्ट धारणा बनाउने तयारी गरिएको स्रोतले जनाएको छ।
यसैबीच, देशको वर्तमान राजनीतिक परिस्थिति, सरकारको कामकारबाहीप्रति पार्टीको धारणा र जनताका चासोका विषयहरूमा समेत बैठकमा समीक्षा भइरहेको बताइएको छ।
पछिल्लो समय देखिएको राजनीतिक अस्थिरता र सत्ता समीकरणका सम्भावित परिवर्तनबारे पनि नेताहरूबीच अनौपचारिक छलफल भइरहेको छ।
पार्टीभित्रको आन्तरिक व्यवस्थापन, संगठन सुदृढीकरण र आगामी राजनीतिक एजेन्डाबारे समेत बैठकमा धारणा आदानप्रदान भइरहेको छ। आवश्यक निर्णयहरू छिट्टै सार्वजनिक गरिने जनाइएको छ।
