काठमाडौं, ३० साउन । प्रहरीले पत्रकार शालिकराम पुडासैनीकाे मृत्यु प्रकरणमा जाेडिएकी युवती अस्मिता कार्कीलाइ पक्राउ गरेकाे छ । नुवाकाेटका पत्रकार पुडासैनी केही दिन अघि चितवनकाे एक हाेटलमा झुण्डिएकाे अवस्थामा फेला परेका थिए ।
पुडासैनीले आत्महत्या गर्नु अघि छाेडेकाे भिडियाे सन्देशमा चर्चित पत्रकार रवि लामिछाने, उनीसँगै काम गर्ने युवराज कँडेल र युवती अस्मिता कार्कीका कारण अाफूले याे बाटाे राेजेकाे बताएका थिए । उक्त भिडियो सार्वजनिक भएसँगै घटनामा नाम जोडिएकी ओखलढुंगाकी युवती अस्मिता कार्कीलाई प्रहरीले पक्राउ गरेको हाे ।
मृतक पुडासैनीले प्राण त्याग्नु अघि रेकर्ड गरेको भिडियोमा नर्ससमेत रहेकी कार्कीको नाम जोडिए पनि उनलाई जिल्ला प्रहरी कार्यालय चितवनको टोलीले काठमाडौंबाट नियन्त्रणमा लिएको हो । जिल्ला प्रहरी कार्यालयका प्रमुख एसपी दानबहादुर मल्लले अनुसन्धानका लागि अस्मितालाई नियन्त्रणमा लिएको बताए ।
मल्लले भने, ‘अहिले अस्मितालाई नियन्त्रणमा लिएर भरतपुर ल्याएका छौं र भिडियोमा नाम जोडिएका अन्य व्यक्तिलाई पनि निगरानीमा राखेका छौं आवश्यक अनुसार नियन्त्रणमा लिएर अनुसन्धान गर्छौं ।’
आत्महत्या गर्नुअघि शालिकरामले खिचेको भिडियोमा रवि लामिछाने, युवराज कँडेल र अस्मिता कार्कीका कारण आफूले आत्महत्या गर्नुपरेको कुरा उल्लेख गरेका थिए । पत्रकार पुडासैनीको शव भरतपुरस्थित एक होटलमा गत २० गते फेला परेको थियो ।
पुडासैनीले आत्महत्या गर्नुअघिको करिब ८ मिनेट लामो भिडियो नै बुधबार सार्वनजिक भएपछि उनको मृत्यु प्रकरण रहस्यमय बन्दै गएको छ । अस्मिता पक्राउ परेसँगै अब प्रहरीले नाम मुछिएका रवि लामिछाने र युवराज कँडेललाइ के गर्छ भन्ने प्रश्न उठेकाे छ ।
भिडियो बाहिरिएसँगै रवि लामिछानेले शालिकरामले लगाएकाे आरोप अस्वीकार गरेका छन् । उनले शालिक ठूलाे भ्रममा रहेकाे भन्दै उक्त घटनाकाे अनुसन्धानमा सहयोग गर्ने बताएका छन्। उनले सामाजिक सञ्जालमा भनेका छन्, ‘आरोप लगाउने मरेर गएपनि आरोप खेप्ने म जिउँदै छु। मर्नेले लगाएको एउटा मात्रै आरोप प्रमाणित होस्, र हदै सम्मको सजाय होस्। थप जानकारी केही समयमा गराउने छु। सारा आरोप सुन्दा लाग्यो- शालिकरामलाई ठूलो भ्रम परेछ।’
त्यसैगरी पुडासैनीले पोलेका युवराजले पनि आरोप अस्वीकार गरेका छन्। उनले सामाजिक सञ्जालमा लेखेका छन् ‘सालिकले भनेकी युवतीलाई न मैले अहिलेसम्म चिनेको छु, न देखेको छु, न भेटेको छु न सालिकसँग जोडीदिएको छु, अनि अस्ट्रेलिया पठाइदिने लगायतका यी यावत आरोपहरुमा एउटा पनि गल्ती म बाट भएको रहेछ भने यो देशमा कानुन छ अनि सबैकुरा देख्ने ईश्वर छ म मर्न तयार छु। सबैकुरा छानबिन होस। हामीले कुनै अपराध गरेका छैनाैँ ।’
याे समाचार पनि हेर्नुहाेस
आत्महत्या अघि पत्रकार पुडासैनीले रविले आफूलाई मारेको भन्दै यसरी धरधरी रोए, हेर्नुहोस् सनसनीपूर्ण भिडियो
