त्रिपोली, लिविया, ४ साउन । लिवियामा लामो समयसम्म राष्ट्रपति बनी सन् २०११ मा जनआन्दोलनको बलमा अपदस्थ शासक मोहमर गद्दाफी युगका अन्तिम प्रधानमन्त्री बग्दादी अल–मोहमौदीलाई स्वास्थ्यको कारण जेलमुक्त गरिएको अधिकारीले जनाएका छन् ।
मौमदीसहित आठ जनालाई लिवियाली जनताको आन्दोलनमा अन्धाधुन्ध बल प्रयोग गरी सयौँ नागरिकको ज्यान लिएको आरोपमा मृत्युदण्डको सजायँ तोकिएको थियो ।उनी चार बर्षदेखि लिवियाली जेलमा रहँदै आएका थिए ।
उत्तर एटलान्टिक सन्धि संगठन (नेटो) को समर्थन पाएको लिवियाली राज्य विद्रोहका समय मौमदीले गद्दाफीको विश्वासपात्रका रूपमा सरकारको नेतृत्व गरेका थिए ।
सत्तरी बर्ष पार गरिसकेका पूर्व प्रधानमन्त्री मौमदी, गद्दाफीका छोरा सैयफ अल–इस्लामसहित तत्कालिन आठ नेतालाई सन् २०१४ मा मृत्युदण्डको सजाय सुनाइएको थियो ।
मौमदीलाई चिकित्सा आयोगको सिफारिस अनुसार ‘स्वास्थ्यको कारण’ रिहा गरिएको छ । उनले विशेष स्वास्थ्य केन्द्रहरूमा स्वतन्त्र रूपमा उपचार गर्न सक्नेछन ।
उनलाई के रोग लागेको र कहाँबाट रिहा गरिएको भन्नेबारे थप विवरण दिइएको छैन ।
