काठमाडौं । सरकारले सोमबार सार्वजनिक बिदा घोषणा गरेको छ । इस्लाम धर्मावलम्बीहरूको महान पर्व इदउलफित्रको अवसरमा सार्वजनिक बिदा घोषणा गरिएको हो ।
इस्लाम धर्मावलम्वीहरुले उर्दू पात्रो अनुसार नवौ महिना रमजान महिनाको ३० दिनसम्म दिनहुँ घाम रहुन्जेल निराहार रहेर बस्ने ब्रत अर्थात् रोजा सम्पन्न गरी इदउलफित्र पर्व मनाउने परम्परा छ ।
इदको बिहानै सम्पूर्ण मुस्लिमले नुहाई पाकसाफ(सफासुघर) भई नयाँ कपडामा नजिकका इद गह अर्थात् चाडपर्वको स्मयमा नमाज पढ्ने स्थानमा गइ नमाज पढ्ने गर्छन् ।
रमजान महिनामा मुस्लिमको सबैभन्दा ठूलो ग्रन्थ कुरान अवतरण भएको र यो महिनामा अल्लाहको कृपा प्राप्त हुने विश्वाससहित धर्मावलम्बीहरु रोजा बस्ने र त्यसको सफलताको खुशीयाली स्वरुप इदउलफित्र मनाइने गर्छन् ।
गरिब र दीनदुःखीलाई सेवा गर्नु, दान दिनु जकात निकाल्नु यो महिनाको ठूलो विशेषता हो । मीठो खानेकुरा खाने र राम्रो लुगा लगाउने पर्वको रुपमा परिचित यो पर्वमा एक अर्कालाई इद मुबारक भनेर शुभकामना आदानप्रदान गरिन्छ ।
