दुधौलीको सहिद स्मृति शान्ति पार्कमा शिव र बुद्धको प्रतिमा अनावरण

 

सिन्धुली । सिन्धुली जिल्लाको दुधौली नगरपालिका–१० स्थित सहिद स्मृति शान्ति पार्कमा शिव भगवान र बुद्ध भगवानको प्रतिमाको भव्य अनावरण गरिएको छ। यस अवसरमा दुधौली नगरपालिकाको पहिचान झल्काउने संरचनाको समेत उद्घाटन गरिएको छ।

उद्घाटन समारोहमा दुधौली नगरपालिका मेयर श्री दिनेश अधिकारी, उपमेयर श्री चन्द्रकिशोर थारु, बागमती प्रदेश प्रहरी तालिम केन्द्रका प्रमुख, सिन्धुली जिल्ला समन्वय समितिका पूर्व उपप्रमुख श्री सम्झना अधिकारी, वडा नं. १० का अध्यक्ष श्री कुमार शर्मा, अन्य वडा अध्यक्षहरू, कार्यपालिका सदस्यहरू, विभिन्न राजनीतिक दलका प्रतिनिधिहरू, कर्मचारीहरू, बुद्धिजीवीहरू तथा स्थानीय नागरिकहरूको उल्लेखनीय उपस्थिति रहेको थियो।

नगर प्रमुख अधिकारीले अनावरण समारोहलाई सम्बोधन गर्दै सहिद स्मृति शान्ति पार्क धार्मिक, सांस्कृतिक तथा पर्यटकीय दृष्टिकोणले महत्वपूर्ण रहेको बताउनुभयो। उहाँले नगरपालिकाले आवश्यक पूर्वाधार विकासलाई प्राथमिकता दिएमा यो क्षेत्र दुधौली नगरकै प्रमुख आकर्षणको रूपमा स्थापित हुने विश्वास व्यक्त गर्नुभयो।

कार्यक्रममा सहभागी नागरिकहरूले सहिद स्मृति शान्ति पार्कलाई अझ व्यवस्थित बनाउँदै धार्मिक तथा पर्यटकीय गन्तव्यका रूपमा विकास गर्नुपर्ने माग राखेका थिए। स्थानीय व्यवसायीहरूले यस पार्कमा बढ्दो पर्यटक चापले आर्थिक गतिशीलता ल्याउने विश्वास व्यक्त गरेका छन्।

नगरपालिकाले सहिद स्मृति शान्ति पार्कमा थप धार्मिक तथा पर्यटकीय संरचनाहरू निर्माण गर्ने योजना बनाइरहेको जनाइएको छ। यदि आवश्यक पूर्वाधार सुधार र प्रवर्द्धन गर्न सकिएमा, यो क्षेत्र ऐतिहासिक, सांस्कृतिक तथा धार्मिक पर्यटनको केन्द्र बन्न सक्ने अपेक्षा गरिएको छ।