निर्माण कम्पनीले पटक पटक म्याद थप गर्दा पनि तोकिएको समयमा निर्माण सम्पन्न नगरेको भन्दै निर्देशनालयले उक्त सडक निर्माणको ठेक्का रद्द गर्ने प्रक्रिया अघि बढाएको बेला निर्माण कम्पनी स्वयम्ले ठेक्का रद्द गरेको घोषणा गरेको हो ।
निर्माण कम्पनीले भक्तपुर–नगरकोट–सिपाघाट सडक स्तरोन्नति परियोजनाको लागि विकास परियोजना निर्देशनालयसँग बारम्बार भएका सम्झौता उल्लंघन र वित्तीय समस्याका कारण सडक निर्माणको सम्झौता रद्द गरेको जनाएको हो ।
‘निर्देशनालयले गरेको बारम्बारका गल्तीहरू समाधान गर्न असफल भएको र यसले परियोजनाको वित्तीय स्थायित्वलाई गम्भीर रूपमा असर पारेकोले सम्झौता रद्द गर्ने निर्णयमा पुगेका हौं,’ विज्ञप्तीमा उल्लेख गरिएको छ ।
विशेषगरी, गत २०८० असोज ९ गते प्रमाणित गरिएको आईपीसी–१४ भुक्तानी अहिलेसम्म नदिइएकोले परियोजनाको वित्तीय अवस्थामा गम्भीर असर परेको निर्माण कम्पनीले जनाएको छ ।
विज्ञप्तिमा निर्देशनालयले महत्वपूर्ण प्रस्तावहरू, जस्तै एस्फाल्ट कन्क्रिट कामहरूको स्वीकृतिमा लापरबाही गरेको र यसले परियोजनाको प्रगतिमा गम्भीर ढिलाइ ल्याएको उल्लेख गरिएको छ । ‘हामीले यस परियोजनालाई अगाडि बढाउन हरेक सम्भाव्य प्रयास गरेका थियौँ । तर, बारम्बार भएका गल्तीहरू र समाधानको अभावले हामीलाई सम्झौता रद्द गर्न बाध्य बनायो,’ विज्ञप्तिमा भनिएको छ ।
एससीसीपीएल–एआईपीएल संयुक्त उद्यमले निर्देशनालयले बारम्बार औपचारिक सूचना दिएको भए पनि ती गल्तीहरू समाधान नगरेको भन्दै गुनासो गरेको छ । ‘हाम्रो कथा बारम्बार दबाइएको छ । यस परियोजनाका वास्तविक पीडित हामी हौँ, जसले असह्य नोक्सानको सामना गर्दै हाम्रो प्रतिबद्धता पूरा गर्ने प्रयास ग¥यौँ,’ विज्ञप्तिमा उल्लेख छ ।
विज्ञप्तीमा निर्देशनालयलाई सबै बाँकी भुक्तानी, वित्तीय शुल्कहरू, र संरचित रूपमा डिमोबिलाइजेसन प्रक्रिया अघि बढाउन तत्काल कदम चाल्न आग्रह गर्दै आफ्नो हकहित सुरक्षित गर्न र नोक्सानी तथा मुनाफाको क्षतिपूर्ति असुल्न कानुनी उपायहरू अवलम्बन गर्न बाध्य हुने चेतावनी समेत दिईएको छ ।
कुल ५२ करोड ९६ लाख रुपैंया लागतको उक्त सडक एआईपिएल र सैलुङ्गले २०७१ जेठमा ३१ करोड ५२ लाख ९२ हजार रुपैंयाँमा ठेक्का सम्झौता गरेको थियो । सम्झौता अनुसार २०७३ असार ३ गते निर्माण सम्पन्न गर्नुपर्ने थियो ।
भारतीय बैंक एक्जिम बैंकको सहुलियतपूर्ण ऋणमा निर्माण शुरु भएको उक्त सडकको पटक पटक म्याद थप हुँदैं आएको थियो । ठेक्का म्याद थपसँगै लागत समेत बढेको छ । ३१ करोड ५२ लाख ९२ हजारमा ठेक्का सम्झौता भएको उक्त सडकको पछिल्लो संशोधित ठेक्का रकम करिव ३६ करोड पुगेको छ ।
