शनिबार साँझ खोटाङको हलेसी दर्शन गरेर भक्तपुर फर्कँदै गरेको जीप दुर्घटनाबारे बागमती प्रदेश सरकारका पूर्व आन्तरिक मामिला मन्त्री गङ्गानारायण श्रेष्ठले जानकारी लिएका छन् । सिन्धुलीका प्रदेश सांसद समेत रहेका श्रेष्ठ सोमबार घटनास्थल पुगी दुर्घटनाबारे जानकारी लिएका हुन् ।
दुर्घटनास्थलको अवलोकनपछि पूर्व मन्त्री श्रेष्ठले सडक विभागले बिछ्याएको चिप्सका कारण दुर्घटना भएको हुनसक्ने तर्क गरेका छन् । ”चिप्समा पुगेपछि गाडी स्वत: अलि असन्तुलित हुनेहुँदा चालक आत्तिएर इमर्जेन्सी ब्रेक लगाएको हुनसक्छ । जसको कारण गाडी असन्तुलित भई सडकबाट नदीमा खसेको हुनसक्छ ।” उनले भने ।
सशस्त्र र नेपाल प्रहरीका उद्धारकर्ताहरू, जनप्रतिनिधि र स्थानीय अगुवाहरूसँग दुर्घटनाको संभावित कारण बुझ्न खोज्दा अधिकांशको यस्तै तर्क पाएको पनि उनले बताएका छन् । हाइवेमा गाडी तीव्र गतिमा रहेको हुनसक्ने र एक्कासी चिप्स देख्दा आत्तिएर ब्रेक लगाउँदा असन्तुलित भई सुनकोशीमा खसेको हुनसक्ने उनको अनुमान छ ।
”सडकमा बिछ्याइएको चिप्स दुर्घटनाको एउटा कारण पक्कै हो ।”उनले ठोकुवा गरे । कारण अरुपनि हुनसक्ने तर चिप्सले दुर्घटना निम्त्याउन सहयोग गरेको देखिएको उनको भनाइ छ । ”तसर्थ, यस्तो प्रविधि सकेसम्म प्रयोग नगर्न र प्रयोग गर्नुपर्ने नै भए चिप्स बिछ्याइएको सडक खण्डमा सूचना पाटीहरू राखेर चालकलाई सचेत बनाउन जरुरी छ ।” पूर्व मन्त्री श्रेष्ठले भने । उनले चिप्सका कारण दुर्घटनाको जोखिम बढेको बताउँदै सरकार, भौतिक योजना मन्त्रालय र सडक बिभागलाई ध्यानाकर्षण समेत गराएका छन् ।
”अव्यवस्थित रूपमा सडकमा बिछ्याइएको यस्तो चिप्सको तुरुन्तै व्यवस्थापन गरियोस् । मानव जीवनसँग खेलबाड नगरियोस् ।” उनको माग छ ।
खोटाङको हलेसी दर्शन गरेर भक्तपुर फर्कँदै गर्दा प्रदेश ३–०१०२३ च ६३६६ नम्बरको इसुजु जीप सिन्धुलीको गोलन्जोर गाउँपालिका-१ कुडुलेनजिक पाख्रिन घुम्तीबाट सुनकोसी नदीमा खसेको थियो । दुर्घटना पछि चालक अविन बके सहित उनका दुई साथीहरु प्रनित सायाँजू र बलराम घटुवको अवस्था अझै अज्ञात छ भने बकेका अर्का साथी सुशान्त कक्षपति भने दुर्घटना लगत्तै पौडिएर निस्किन सफल भएका छन् ।
दुर्घटनामा परेका सबै भक्तपुरवासी हुन् । चालक अविन बके रानीकोटस्थित भिलेज हाइल्याण्ड रिसोर्टका संचालक रामसुन्दर बकेका जेठा छोरा हुन् ।
