काठमाडौँ । २०७२ सालको भुकम्पले भत्काएको धरहरा पुननिर्माण गर्ने कार्य सम्पन्न भएको छ । पुननिर्मित धरहराको आज प्रधानमन्त्री केपी ओलीले उदघाटन गरेका हुन् ।
वि.सं. २०७२ वैशाख १२ गते आएको भूकम्पबाट पूर्ण रुपमा क्षति भएको धरहराको नजिकै यो नयाँ धरहरा निर्माण गरिएको छ । राष्ट्रिय पुनर्निर्माण प्राधिकरणले धरहरालाई पुनर्निर्माण गरेको हो ।
पुनर्निर्मित धरहरा बाहिरबाट ११ तला देखिने तर भित्र २२ तलाको रहेको छ । मौलिकताको सम्बर्द्धन गर्दै आधुनिक रुप समेत यसमा दिइएको प्राधिकरणले जनाएको छ ।
धरहरामा विद्युतीय लिफ्ट र भर्याङको समेत व्यवस्था गरिएको छ । २२ औं तलामा महादेवको मुर्ति राखिएको छ । २०७२ फागुन ४ गते तत्कालिन प्रधानमन्त्री ओलीले ‘मेरो धरहरा मै बनाउँछु’ अभियान घोषणा गरेका थिए । २०७५ पुस १२ गते प्रधानमन्त्री ओलीले धरहराको शिलान्यास गरेका थिए ।
पुनर्निर्मित धरहरा उद्घाटन समारोहमा धरहरा भत्कँदा घाइते भइ ज्यान जोगाउन सफल भएका व्यक्तिलाई सम्मान गरिएको छ । त्यस्तै धरहरा पुनर्निर्माणमा सहयोग पुर्याउने व्यक्तिलाई सम्मान गरिएको छ ।
