रौतहट, २५ फागुन । रौतहटमा रोकिराखेको ट्रकलाई अर्को ट्रकले ठक्कर दिदा सहचालकको मृत्यु भएको छ । पूर्व–पश्चिम लोकमार्गको चन्द्रनिगाहपुर– बागमती सडक खण्डमा भएको दुर्घटना परेर दुर्घटना हुँदा धनुषा जिल्ला शहिद नगरपालिकाका अन्दाजी २० वर्षीय मनोज कुमार यादवको मृत्यु भएको हो ।
मृतक यादवको शव ट्रकको स्टेरिङ च्यापिएको अवस्थामा निकालिएको थियो । सो सडक खण्डको चन्द्रपुर १ स्थित पौराइ जंगलमा जङ्गलमा टायर पञ्चर भएर मर्मत गर्न रोकिरहेको ना ६ ख ७०१३ मालबाहक ट्रकलाई सोही दिशाबाट आइरहेको ना ६ ख ३८२२ अर्को ट्रकले पछाडिबाट ठक्कर दिँदा दुर्घटना भएको प्रहरीले जनाएको छ ।
मृत्यु हुनेमा ठक्कर दिने ना ६ ख ३८२२ को ट्रकका सहचालक रहेको इलाका प्रहरी कार्यलय चन्द्रनिगाहपुरका निमित्त प्रमुख प्रहरी निरिक्षक राजन थापाले जानकारी दिए । सो ट्रक सहचालक यादवले नै चलाएको र ट्रकका चालक धनुषा जिल्ला गणेशमान चारनाथ नगरपालिका-१ का श्यामसुन्दर यादव गम्भीर घाइते भएको उनले बताए ।
घाइते यादवको खुट्टा भाँचिएको र उपचारको लागि बिरगंज रेफर गरिएको उनले जानकारी दिए । मृतक यादवको शव पोष्टमार्टमको लागी चन्द्रनिगाहपुर सरकारी अस्पतालमा राखिएको र उनीसँग सवारीचालक अनुमतिपत्र रहेको नरहेको भन्ने बारेमा अनुसन्धान भइरहेको प्रहरीले जनाएको छ ।
