काठमाडौं, ५ चैत ।
नेपाली कांग्रेसका नेताहरु प्रतिनिधिसभा र प्रदेशसभा निर्वाचनपछि फेरि गुट अदलबदलमा सक्रिय बनेको समाचारलाई आजको नागरिक दैनिकले पहिलो पृष्ठमा छापेको छ ।
पार्टीभित्र एक नेताले अर्कोलाई निरीह र आफूलाई शक्तिशाली देखाउन गुट बनाउने र भत्काउने खेल कांग्रेसमा पुरानै हो । निर्वाचनमा पराजयपछि कांग्रेसमा यो खेलले अलि बढ्तै ठाउँ पाएको देखिन्छ ।
नागरिक दैनिकका अनुसार नेताहरुले गुट अदलबदल गर्दा शेरबहादुर देउवा र रामचन्द्र पौडेल समूहमा मात्रै होइन, १३ औं महाधिवेशनपछि अस्तित्वमा आएको कृष्णप्रसाद सिटौला समूहमा समेत हलचल आएको छ ।
महाधिवेशन भएको दुई वर्षमा सभापति शेरबहादुर देउवा गुटबाट अर्जुननरसिंह केसी, कुलबहादुर गुरुङ र चन्द्र भण्डारी बाहिरिएका छन् ।
यसैगरी पौडेल र सिटौला समूह पनि एकपछि अर्को गर्दै कमजोर बन्न पुगेको नागरिकको समाचारमा उल्लेख छ ।
