काठमाडौँ । गृह मन्त्रालयले गणेश नेपालीले आत्मदाह गरेको घटनामा छानबिन गर्न समिति गठन गरेको छ। शुक्रबार प्रतिनिधि सभाको बैठकमा गृहमन्त्री गुरूङले ५ सदस्यीय समिति गठन गरेको जानकारी गराएका हुन्।
उनका अनुसार काठमाडौं उपत्यका प्रहरी कार्यालय रानिपोखरीका डिआइजी गोबिन्द थपलियालाई संयोजक बनाइएको छ।
‘डिआइजी गोबिन्द थपलियाको संयोजकत्वमा ५ सदस्यीय समिति गठन गरेका छौं। तीन नगर प्रहरी सोधपुछका लागि नियन्त्रणमा लिएका छौं,’ उनले भने, ‘यसमा हामी निष्पक्ष रूपमा छानबिन गर्छौं।’ नियन्त्रणमा लिइएका दुई जना महिला नगर प्रहरी र एक जना पुरूष नगर प्रहरी हुन्।
मुगुका गणेश नेपालीको शुक्रबार बिहान वीर अस्पतालमा उपचारको क्रममा मृत्यु भएको हो। उनले बिहीबार दिउँसो राहदानी विभाग अगाडिको सडकमा आत्मदाह गरेका थिए।
