काठमाडौँ । संयुक्त विद्यार्थी संगठनले सरकारद्वारा सुकुमबासीमाथि गरिएको अन्यायपूर्ण विस्थापनको विरोध र आत्मदाह गरेका मुगुका गणेश नेपालीको न्यायको माग गर्दै काठमाडौँको माइतीघर मण्डलामा विरोध प्रदर्शन गरेको छ।
काठमाडौं महानगरपालिकाले पार्किङ निषेधित क्षेत्रमा मोटरसाइकल राखेको भन्दै ह्विल लक गरेपछि असन्तुष्ट बनेका नेपालीले त्रिपुरेश्वरमा आत्मदाहको प्रयास गरेका थिए र उनको उपचारका क्रममा निधन भएको थियो। सोही घटनालाई लिएर विद्यार्थीहरू आन्दोलित भएका हुन्।
प्रदर्शनमा उत्रिएका विद्यार्थीहरूले राज्य संयन्त्र गरिब, श्रमजीवी र सुकुम्बासी वर्गप्रति निरङ्कुश र संवेदनहीन बनेको आरोप लगाएका छन्। उनीहरूले विना विकल्प सुकुमबासीहरूलाई उनीहरूको बसोबास स्थलबाट बलपूर्वक विस्थापन गर्नु अन्यायपूर्ण भएको बताए। सो क्रममा विद्यार्थी नेताहरूले सरकारले नागरिकको जिउधनको रक्षा गर्नुको साटो जरिवाना र करका नाममा आतङ्कित पारेको भन्दै आक्रोश व्यक्त गरे।
आन्दोलनकारीहरूले गणेश नेपालीको आत्मदाह घटनाको निष्पक्ष छानबिन गरी दोषीमाथि कडा कारबाही गर्न र पीडित परिवारलाई उचित क्षतिपूर्ति दिन माग गरेका छन्। त्यसैगरी अव्यवहारिक जरिवाना प्रणाली खारेज गर्न र सुकुमबासीहरूको उचित व्यवस्थापन गर्न पनि उनीहरूले सरकारसँग आग्रह गरे।
