कोलम्बो । कोलम्बोको सिंहली स्पोर्ट्स ग्राउन्डमा आजदेखि सुरु भएको टी–२० विश्वकप २०२६ को पहिलो खेलमा पाकिस्तानले नेदरल्यान्ड्सलाई पराजित गर्दै विजयी सुरुवात गरेको छ ।
रोमाञ्चक प्रतिस्पर्धामा पाकिस्तानले नेदरल्यान्ड्सले दिएको १४८ रनको लक्ष्य सफलतापूर्वक पूरा गर्यो ।
टस जितेर पाकिस्तानले पहिले बलिङ गर्ने निर्णय गरेको थियो । नेदरल्यान्ड्सको पूरै टोली १९.५ ओभरमा १४७ रनमा अलआउट भयो र पाकिस्तानलाई १४८ रनको लक्ष्य दियो । नेदरल्यान्ड्सका कप्तान स्कट एडवर्ड्सले सर्वाधिक ३७ रन बनाएका थिए ।
पाकिस्तानका लागि सलमान मिर्जाले उत्कृष्ट बलिङ गर्दै सर्वाधिक ३ विकेट लिएका थिए । नेदरल्यान्ड्सका १० मध्ये ९ ब्याट्सम्यान क्याच आउट भएका थिए भने अबरार अहमदले कोलिन एकरम्यानलाई बोल्ड गरेर एक मात्र विकेट लिएका थिए ।
जवाफी ब्याटिङ गरेको पाकिस्तानले १९ ओभर ३ बलमा ७ विकेट गुमाएर लक्ष्य पूरा गरेको हो । पाकिस्तानको जित सुनिश्चित गर्न फहीम अशरफ र शाहिन अफ्रिदी क्रिजमा रहेका थिए । नेदरल्यान्ड्सका बलरहरूले पाकिस्तानका महत्त्वपूर्ण विकेटहरू लिए पनि हार टार्न सकेनन् ।
लोगन भ्यान बीकले शादाब खान (८ रन) लाई विकेटकिपर स्कट एडवर्ड्सको हातबाट क्याच आउट गराएका थिए । कोलिन एकरम्यानले हसन नवाब (६ रन) लाई आउट गरे भने रोलोफ भ्यान डेर मेरवेले बाबर आजम (१५ रन) को विकेट लिएका थिए ।
पल भ्यान मीकेरेनले उस्मान खानलाई ३ रनले अर्धशतक बनाउन दिएनन् । आर्यन दत्तले सलमान आगा र सईम अयूबको विकेट झारेका थिए ।
