भक्तपुर । जिल्ला हुलाक कार्यालय भक्तपुरले सूचनाको हक कार्यान्वयनलाई जिल्लामा कसरी प्रभावकारी बनाउन सकिन्छ भन्ने विषयमा अभियन्ता एवं सरोकारवालासंग अन्तरक्रिया गरेको छ ।
कार्यालय प्रमुख सीता साम्बाले सूचनाको हक कार्यान्वयनको अवस्थाबारे अवगत गराउँदै सरोकारवालासंग यसका लागि आवश्यक सुझाव लिएकी हुन् ।
कार्यालय प्रमुख साम्बाले हालसम्म ३५ वटा कार्यालयले सूचनाको हक प्रयोग गरी माग भएका सूचनाको विवरण उपलब्ध गराएको बताइन् ।
उनले सूचना अधिकारी तोके नतोकेको र सूचनाको हकको सम्बोधन भए नभएको लगायत हुलाक कार्यालयलाई प्राप्त अधिकारका आधारमा अनुगमनलाई प्राथमिकतामा राखेर काम गरिरहेको पनि जानकारी गराइन ।
कार्यालयमा आयोजित कार्यक्रममा सूचनाको हक सम्बन्धि सक्रिय अभियन्ता एवं सूचनाको हकको लागि राष्ट्रिय महासंघ भक्तपुरका जिल्ला अध्यक्ष ई. हरिराम कोण्डाले सबै सेवाग्राहीले सूचनाको हकको प्रयोग गर्नसके अनावश्यक ढिलासुस्ती र अनियमितता रोक्न सकिने स्पष्ट पारे ।
आफूले शुरुमा ब्यक्तिगत प्रयोगका लागि सूचना माग गरेको र पछि यसलाई सार्वजनिक हितको लागि उपयोग गरिरहेको अभियन्ता कोण्डाले बताए ।
अझैपनि आन्तरिक राजस्व कार्यालय भक्तपुरले सूचना उपलब्ध नगराएको र सूचना आयोगको निर्देशन समेत अटेर गरेको उनले जानकारी गराए ।
राष्ट्रिय सूचना आयोगले आफूलाई यस् वर्षको उत्कृष्ट अभियन्ताको सम्मान समेत दिएकोले सूचनाको हक प्रवर्द्धन अभियानमा अझ ससक्त भएर लाग्ने उनको भनाइ छ । “यो अब मेरो ब्यक्तिगत अभियान होइन, सामाजिक अभियान हो ।” उनले भने ।
सो अवसरमा नेपाल पत्रकार महासंघ उपत्यका प्रदेश समितिको कोषाध्यक्ष संजीप घिमिरे शुभचिन्तकले सूचनाको हकको ब्यवस्था सार्वजनिक सेवालाई जवाफदेही बनाउने हतियार भएको भन्दै नयाँ पुस्तालाई यसको प्रयोगमा जागरुक बनाउन सके सकारात्मक परिणाम आउन सक्ने बिचार ब्यक्त गरे ।
“यो भएन र त्यो भएन भनेर निराशा मात्र बाढिरहने नयाँ पुस्ताले सूचनाको हक प्रयोग गरी किन भएन र कहिले हुन्छ भन्ने प्रश्न गर्न थाल्ने हो भने रुपान्तरण सम्भव छ ।” घिमिरेले भने । उनले त्यसका लागि हुलाक कार्यालयले सचेतनामूलक अभियान चलाउनुपर्ने आवश्यकता औल्याएका छन् ।
नेपाल पत्रकार महासंघ भक्तपुरका अध्यक्ष सुन्दर सिल्पकारले सूचनाको हक प्रवर्द्धनमा जिल्ला शाखाले सक्दो सहयोग गर्ने प्रतिवद्धता प्रकट गरे ।
त्यसैगरी राष्ट्रिय सूचना आयोगका पूर्व आयुक्त रत्नप्रसाद मैनालीले सूचना मागकर्ता र सूचना अधिकारी एकै रथका दुई पाङ्ग्रा भएपनि उनीहरूबीच सौहार्द सम्बन्ध हुन नसकेको बताए ।
कार्यालयले मागिएका सूचनालाई सजिलै र पार्दर्शी ढ्ङ्गले उपलब्ध गराउनु साटो आलटाल गर्ने र हतोत्साहित गराउने प्रवित्ति रहेको र कतिपय सूचना मागकर्ताले पनि दु:ख दिने नियतले अनावश्यक र लामो समयदेखिको सूचना माग गर्ने पाइएको उनले अनुभव सुनाए ।
सूचनाको हकलाई बोझको रुपमा नलिई सुशासन बिधिको रुपमा बुझ्न पर्ने उनले बताएका छन् । जिल्ला हुलाक कार्यालय भक्तपुरले सरकारी कार्यालयका सूचना अधिकारीलाई यसबारे अभिमुखीकरण समेत गराएकोप्रति उनले सन्तोष ब्यक्त गर्दै सबै सूचना अधिकारीलाई समयमै सूचना उपलब्ध गराउन आवश्यक तालिम दिनुपर्ने आवश्यकता समेत औल्याए ।
सो अवसरमा जिल्ला हुलाक कार्यालय भक्तपुरका कर्मचारीहरुको समेत उपस्थिति रहेको थियो ।
