भक्तपुर ,२० असोज २०८१। पटक-पटक स्थगित हुँदै आएको नेपाल पत्रकार महासंघको निर्वाचन अन्ततः मंसिर २८ गते हुने भएको छ। शनिबार भक्तपुर थिमिस्थित बोदेमा सम्पन्न प्रदेश र जिल्ला अध्यक्षहरूको राष्ट्रिय भेलाले मंसिर २८ मा सबै तहको निर्वाचन गर्ने सहमति गर्दै नयाँ नेतृत्व चयनको लागि बाटो खुला गरेको हो।
महासंघको उक्त भेलाले निर्वाचन मिति तोक्न मात्र होइन, लामो समयदेखि विवादमा रहेको सदस्यता समस्याको समाधानको लागि पनि केही महत्वपूर्ण निर्णयहरू गरेको छ। सदस्यता विवादकै कारण यसअघि बैशाखमा हुनुपर्ने निर्वाचन पटक-पटक स्थगित हुँदै आएको थियो। महासंघको राष्ट्रिय भेलाले यस प्रकारको निर्णय गरेको छ:-
१. शाखा कार्य समितिले निर्णय गरि सर्वसम्मत टुङ्गो लगाएर प्रदेशमा पठाएका र प्रदेशले सर्वसम्मत थप गरि पास गरेका सदस्यता कायम गर्ने । (जिल्लाले पठाएको तर प्रदेशले हटाएका नामहरुमा जिल्लालाई नै कायम गर्न।)
२. विवाद भएका शाखाहकमा केन्द्र, प्रदेशका प्रतिनिधि र शाखा अध्यक्ष रहने समितिले टुङ्गो लगाउने ।
३. सदस्यता सम्बन्धि सबै विवाद कार्तिक मसान्तसम्म टुङ्गो लगाईसक्ने ।
४. मंसिर २८ गते महासंघका सबै संरचनाको निर्वाचन गर्ने ।
सदस्यता विवाद समाधानको लागि महासंघ केन्द्र, प्रदेशका प्रतिनिधि, र शाखा अध्यक्षहरू सम्मिलित एउटा विशेष समितिको गठन गरिने निर्णय भएको छ। उक्त त्यो समितिले सदस्यता विवाद भएका शाखाहरूको अन्तिम निर्णय गर्नेछ। यस प्रक्रियालाई छिटो टुंगोमा पुर्याउने उद्देश्यले कार्तिक मसान्तसम्म सदस्यता सम्बन्धी सबै विवादहरू समाधान गरिने छ।
सदस्यता विवादका कारण उत्पन्न अवरोधकै बीच, महासंघका अध्यक्ष विपूल पोखरेलले निर्वाचन गराउन नसक्दा राजीनामा दिएका थिए। पोखरेलको राजीनामापछि वरिष्ठ उपाध्यक्ष रमेश विष्टले कार्यवहाक अध्यक्षको जिम्मेवारी सम्हालेका थिए। तर, विष्टले पनि पद त्याग गरेपछि हाल उपाध्यक्ष बाला अधिकारीले कार्यवहाक अध्यक्षको भूमिका सम्हालिरहेकी छिन्। कार्यवहाक अध्यक्ष अधिकारीका अनुसार, यस पटक निर्वाचन प्रक्रिया सहज रूपमा अघि बढाउन महासंघले सबै पक्षलाई समेटेर सहमतिको प्रयास गरेको छ।
सदस्यता विवादका कारण लामो समयदेखि प्रतिक्षारत निर्वाचन प्रक्रिया सुचारु हुँदा महासंघमा नयाँ नेतृत्व आउनुका साथै आन्तरिक एकता बलियो हुने अपेक्षा गरिएको छ। यस पटकको निर्वाचनले महासंघलाई मात्र नभएर पत्रकारहरूको हित र अधिकारको पक्षमा ठोस योगदान पुर्याउने विश्वास गरिएको छ। महासंघका केही सदस्यहरूले सदस्यता विवादको समाधानसँगै आगामी निर्वाचनले पत्रकारहरूको पेशागत सुरक्षालाई प्राथमिकतामा राख्नुपर्ने धारणा राखेका छन्।
महासंघको निर्वाचनको तयारीमा रहेका केही नेताहरूले मंसिर २८ मा हुने निर्वाचनले पुराना समस्या समाधान गर्दै नयाँ नेतृत्वलाई अगाडि ल्याउन महत्त्वपूर्ण भूमिका खेल्ने बताएका छन्। नयाँ नेतृत्व चयनसँगै महासंघले आफ्नो संगठनात्मक ढाँचालाई थप सुदृढ गर्दै, सदस्यहरूको हकहितमा समर्पित रूपमा काम गर्ने अपेक्षा गरिएको छ।
यस प्रकार, पत्रकार महासंघको निर्वाचनले पत्रकारिताको क्षेत्रलाई पुनः सक्रिय बनाउँदै नयाँ चुनौतीहरूको सामना गर्न तयार गर्न महत्वपूर्ण अवसरको रूपमा लिइएको छ।
