काठमाडौं, ११ माघ । कोरोना महामारी हुँदैनथ्यो त लोकप्रिय गायक प्रकाश सपूतलाई दर्शकले सिनेमा हलको पर्दामा हेरिसकेका हुन्थे । उनको पहिलो चलचित्र ‘परदेशी २’ निर्माण सम्पन्न भएको लामो समय भइसक्दा पनि कोरोना महामारीका कारण प्रदर्शन हुन नपाउँदा दर्शकहरुले उनलाई ठूलो पर्दामा हेर्न पाएका छैनन् ।
‘परदेशी २’ २०७७ सालको दशैंमा प्रदर्शन गर्ने योजनाका साथ छायांकन शुरु गरिएको थियो । तर कोरोना महामारी शुरु भएपछि चलचित्रको छायांकन नै बीचमै रोक्नुपर्यो । कोरोना संक्रमण घटेपछि २०७७ को दशैंपछि बल्ल चलचित्रको छायांकन पूरा भयो । निर्माणपक्षले यसै वर्षको दशैंमा चलचित्र प्रदर्शन गर्ने सोच बनाएको थियो, तर त्यसबेला चलचित्र प्रदर्शनमा आउन पाएन । ‘परदेशी २’लाई अब आगामी दशैंमा रिलिज गर्ने निर्माणपक्षको योजना छ ।
गीत–संगीत र म्युजिक भिडियोमा राम्रो काम गरेको भनेर प्रशंसा पाइरहेका प्रकाशले चलचित्रमा गरेको कामको भने परीक्षण हुन बाँकी नै छ । यद्यपि, उनले ‘परदेशी २’मा राम्रो काम गरेको चलचित्रका कलाकारहरुले बताउँदै आएका छन् ।
केही समय एक म्युजिक भिडियो सार्वजनिक कार्यक्रममा अभिनेत्री केकी अधिकारीले प्रकाशको कामको खुलेर प्रशंसा गरेकी थिइन् । त्यसबेला केकीले सांगीतिक क्षेत्रमा सबैको मन जितेका प्रकाशले चलचित्रमा पनि निकै राम्रो काम गरेको बताएकी थिइन् ।
‘परदेशी २’ मा शीर्ष भूमिकामा रहेकी केकीले भनेकी थिइन्, ‘चलचित्रमा उहाँले निकै राम्रो काम गर्नुभएको छ । कोरोना महामारी नभएर निर्धारित मितिमै चलचित्र प्रदर्शनमा आएको भए शायद अहिले उहाँ अन्य चलचित्रमा आवद्ध भइसकेको हुनुहुन्थ्यो ।’
शायद, प्रकाशलाई पनि त्यस्तै लागेको हुनसक्छ । चलचित्रमा अभिनय गर्ने प्रकाशको सानैदेखिको सपना थियो । सांगीतिक क्षेत्रमा आउनुअघि उनी चलचित्रको ‘हिरो’ बन्ने सपना बुनेका थिए । तर समयले उनलाई सांगीतिक क्षेत्रमा स्थापित गरायो ।
‘परदेशी २’मा मुख्य अभिनेताको रुपमा अभिनय शुरु गर्दा उनले शायदै सोचेका थिए, आफ्नो पहिलो चलचित्र हेर्न लामो समय कुर्नुपर्ला भनेर ।
