माघ ११ ,काठमाडौँ । काठमाडौँ महानगरपालिकाले अनुगमन कार्यविधि मस्यौदा तयार पार्न पाँच सदस्यीय समिति गठन गरेको छ। महानगरले उपभोक्ताहरुको हकहितलाइ ध्यानमा राख्दै गर्दै आएको बजार अनुगमनलाइ अझ सरल, सहज, नतिजामुखी बनाउनका लागि समिति गठन गरिएको हो।
महानगरपालिका उपप्रमुख हरिप्रभा खड्गीको अध्यक्षतामा मंगलबार बसेको विभागीय प्रमुखहरुको बैठकले समिति गठन गर्ने निर्णय भए अनुसार योजना अनुगमन तथा मूल्याङ्कन एकाइका प्रमुख नरेन्द्रविलास बज्राचार्यको संयोजकत्वमा गठित समितिको सदस्यहरुमा डा. शिवराज अधिकारी, वसन्त आचार्य, रामबहादुर थापा र बलराम त्रिपाठी रहनुभएको छ।
बैठकमा बोल्दै प्रमुख खड्गीले भन्नु भयो – ‘ स्थानीय सरकार सञ्चालनका लागि प्राप्त संवैधानिक अधिकार, स्थानीय सरकार सञ्चालन ऐनले पालिकाहरुलाई दिएका जिम्मेवारी, सेवा प्रवाह, नगरसभा र कार्यपालिका बैठकबाट गरिएका निर्णयहरुलाई आधार मानेर कार्यविधिमार्फत अनुगमनलाई एकीकृत र नतिजामुखी बनाउनुलाई लक्ष्य मानेर काम गर्नु आजको आवस्यकता हो । ’
