पुस २९, काठमाडौँ ।
नेपालमा पछिल्ला केही दिनमा कोरोना भाइरसको सङ्क्रमण दर वृद्धि भएपछि सरकारले रोकथाम र न्यूनीकरण कार्यलाई पनि तीव्र रूपमा अघि बढाएको छ । स्वास्थ्य तथा जनसङ्ख्यामन्त्री विरोध खतिवडाका अनुसार मन्त्रालयले सबै संरचना परिचालन गरेर कोभिड सङ्क्रमण नियन्त्रण र रोकथामको काम सुरु गरेको छ ।
स्वास्थ्य तथा जनसङ्ख्या मन्त्रालयका प्रवक्ता डा. सङ्गीता मिश्राका अनुसार कोभिड–१९ को महामारी पुनः फैलिएपछि प्रारम्भिक चरणका सम्पूर्ण तयारी सुरु गरिएको बताउनुभयो । उहाँले गोरखापत्रसँग भन्नुभयो, “कोरोना भाइरस सङ्क्रमण बढेपछि सीमा नाकाका सतर्कता बढाइएको छ । कन्ट्याक्ट ट्रेसिङ र एन्टिजेन परीक्षण पनि वृद्धि गरिएको छ ।” डा. मिश्राले स्थानीय सरकारहरूसँग समन्वय गरेर क्वारेन्टाइन र आइसोलेसनको व्यवस्थापन कार्य अघि बढाएको बताउनुभयो । सङ्क्रमण बढेका क्षेत्रबाट अन्यत्र नफैलियोस् भनेर उच्च सतर्कताका साथ परीक्षण भइरहेको पनि उहाँले बताउनुभयो ।
९२ लाख मात्रा खोप सञ्चित
देशभरि पर्याप्त मात्रामा खोप उपलब्ध गराउने नीति सरकारले लिएको छ । डा. मिश्राका अनुसार सातै प्रदेश र ७७ वटै जिल्लामा खोपको पहुँच विस्तार गरिएको छ । साथै माघ पहिलो सातादेखि बुस्टर खोप लगाउने गरी तयारी भइरहेको उहाँले बताउनुभयो ।
डा. मिश्राले भन्नुभयो, “अहिले हामीसँग ९२ लाख डोज खोप बाँकी छ । थप एक करोड १५ लाख खोप ल्याउने प्रक्रिया पूरा भएको छ । खपत हुँदै जान्छ, थप खोप आउँछ । कोभिड प्रकोपविरुद्ध सबै सम्भावनामा सरकारले काम गरिरहेको छ ।”
सातै प्रदेशमा पूर्वाधार
सरकारले सातै प्रदेशमा कोभिड अस्पताल सञ्चालन गरी आवश्यक पूर्वाधार र भौतिक संरचना निर्माण गरेको छ । खोप र अत्यावश्यक औषधि पनि तयारी अवस्थामा राखिएको छ । मन्त्रालयका सहप्रवक्ता डा. समीरकुमार अधिकारीका अनुसार प्रदेश १ मा आइसोलेसन बेड ८१९, एचडीयू बेड ५६७, आईसीयू बेड ३४२, भेन्टिलेटर १४८, अक्सिजन सिलिन्डर एक हजार १४ थान, अक्सिजन कन्सन्ट्रेटर ६६, अक्सिजन प्लान्ट १७ र ट्याङ्क दुईवटा तयारी अवस्थामा छन् ।
प्रदेश २ मा आइसोलेसन बेड १६८०, एचडीयू बेड ६९५, आईसीयू बेड ३९६, भेन्टिलेटर १२४, अक्सिजन सिलिन्डर दुई हजार ३६८ थान, अक्सिजन कन्सन्ट्रेटर ३६, अक्सिजन प्लान्ट आठ र ट्याङ्क दुईवटा उपलब्ध छन् । त्यसैगरी बागमती प्रदेशमा आइसोलेसन बेड तीन हजार २८३, एचडीयू बेड ११९१, आईसीयू बेड १४२३, भेन्टिलेटर ५३२, अक्सिजन सिलिन्डर तीन हजार ६९०, अक्सिजन कन्सन्ट्रेटर १५८, अक्सिजन प्लान्ट २८ र ट्याङ्क १५ वटा तयारी अवस्थामा रहेको डा. अधिकारीले बताउनुभयो ।
त्यसैगरी गण्डकी प्रदेशमा आइसोलेसन बेड ६५१, एचडीयू बेड ४४४, आईसीयू बेड २२८, भेन्टिलेटर ८२, अक्सिजन सिलिन्डर दुई हजार ३०५, अक्सिजन कन्सन्ट्रेटर ८५, अक्सिजन प्लान्ट १७ र ट्याङ्क एउटा उपलब्ध छ । डा. अधिकारीले लुम्बिनी प्रदेशमा आइसोलेसन बेड ४५२, एचडीयू बेड ६४०, आईसीयू बेड २३९, भेन्टिलेटर ५६, अक्सिजन सिलिन्डर दुई हजार ७६६, अक्सिजन कन्सन्ट्रेटर ६९, अक्सिजन प्लान्ट १६ र ट्याङ्क तीनवटा उपलब्ध रहेको बताउनुभयो ।
कर्णाली प्रदेशमा आइसोलेसन बेड ६०७, एचडीयू बेड ९६, आईसीयू बेड ९७, भेन्टिलेटर ३५, अक्सिजन सिलिन्डर ४०५, अक्सिजन कन्सन्ट्रेटर ८० र अक्सिजन प्लान्ट सातवटा छन् । सुदूरपश्चिम प्रदेशमा आइसोलेसन बेड ७१०, एचडीयू बेड २१३, आईसीयू बेड ७२, भेन्टिलेटर ३१, अक्सिजन सिलिन्डर एक हजार ३९१, अक्सिजन कन्सन्ट्रेटर १९९, अक्सिजन प्लान्ट पाँचवटा र ट्याङ्क दुईवटा रहेको डा. अधिकारीले बताउनुभयो ।
आजको गोरखापत्र दैनिकबात
