काठमाडौं। राष्ट्रपति विद्यादेवी भण्डारीले संसद् विघटन गरि चुनाव घोषण गरेपछि असन्तुष्ट सांसदहरुले यो कदम खारेजीको माग गर्दै सर्वोच्च जानेबारे तैयारी थालेको छ । यो कदमविरुद्ध संसद् भवन बानेश्वरमा बसेको सर्वदलीय बैठकले राष्ट्रपति विद्या भण्डारी र प्रधानमन्त्री केपी ओलीको कदमलाई गलत भएको ठहर गर्दै खारेज गर्ने रणनीति र आन्दोलनबारे छलफल हुने बताइएको छ।
बैठकमा नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एमालेको असन्तुष्ट नेता माधवकुमार नेपाल, जनता समाजवादी पार्टीको उपेन्द्र यादव पक्ष र राष्ट्रिय जनमोर्चाका नेताहरू सहभागी छन्।
विपक्षी सांसदहरूले राष्ट्रपति र प्रधानमन्त्रीले संविधानमाथि जालसाजी गरेको भन्दै यो कदमलाई प्रतिगमनको संज्ञा दिएका छन्।
शुक्रबार मध्यरातमा बालुवाटारमा बसेको मन्त्रिपरिषद् बैठकले प्रतिनिधिसभा भंग गरी मध्यावधि निर्वाचनको घोषणाका लागि राष्ट्रपतिसमक्ष सिफारिस गरेको थियो ।
यसअघि पनि प्रधानमन्त्री ओलीले पुस ५ गते संसद विघटन गरेर चुनावमा जाने निर्णय गरेका थिए। तर कदमलाई सर्वोच्चले फागुन ११ गते बदर गर्दै संसद् पुनःस्थापना गरिदिएको थियो। विघटन भएको संसद् पुनर्स्थापनाका लागि विपक्षीहरूले आन्दोलनसमेत गरेका थिए।
