काठमाडौँ, १५ पुस । सञ्चार तथा सूचना प्रविधिमन्त्री गोकुल प्रसाद बाँस्कोटाले कालापानी, लिपुलेक नेपालकै भएको बताएका छन् । मंगलबार प्रेस संगठन नेपाल कञ्चनपुरले आयोजना गरेको पत्रकार सम्मेलनमा बोल्दै मन्त्री बाँस्कोटाले कालापानी र लिपुलेक नेपालकै भएको बताएका हुन् । ‘कालापानी र लिपुलेक नेपालकै हो यो प्रश्न नै होईन, ‘मन्त्री बाँस्कोटाले भने, ‘बरु लिम्पियाधुराको कुरा दोस्रो विषय हो ।’
भारतले दार्चुला स्थित नेपाली भूमि समेटेर नक्सा सार्वजनिक गरेपछि सरकारले ईतिहासमै पहिलो पटक भारत सरकारलाई कुटनीतिक नोट पठाएको बताउँदै मन्त्री बाँस्कोटाले भारतबाट समेत त्यसको सकारात्मक जवाफ आएको बताए । ‘सीमाको विषयमा हुती भएको सरकारले भारतलाई पत्र पठायो, ‘मन्त्री बाँस्कोटाले भने, ‘भारतबाट त्यस विषयमा सकारात्मक सम्बोधन भएको छ ।’
ब्रिटिशकालिन समयदेखि जनगणना, विभिन्न मालपोत तिरोतारो लगायतका अन्य तथ्य प्रमाणबाट समेत कालापानी नेपालकै क्षेत्र भएको बताउँदै मन्त्री बाँस्कोटाले कालापानी नेपालको भएको दावि नभई हक भएको बताए । उनले महाकाली नेपाल भारतको सीमा नदी भएको बताउँदै अन्तर्राष्ट्रिय मान्यता अनुसार भारतले स्वीकार गर्नुपर्नेमा जोड दिए । ‘सार्वभौमसत्ता सबैको बराबर हुन्छ, ‘मन्त्री बाँस्कोटाले भने, ‘सीमा कचिङगल गरेर बस्नु कसैका लागि स्वीकार्य छैन् ।’
सरकारले विभिन्न च्यानल प्रयोग गरेर भारतसंग रहेका सीमा विवाद हल गरिरहेको मन्त्री बाँस्कोटाले बताए । सरकारका प्रवक्ता समेत रहेका मन्त्री बाँस्कोटाले प्रधानन्त्रीले चाहे, आवश्यकता अनुसार मन्त्रीपरिष्द समेत हेरफेर हुनसक्ने बताए ।
