काठमाडौं । पत्रकार शालिकराम पुडासैनी आत्महत्या प्रकरणमा पक्राउ परेका रवि लामिछानेले प्रहरी समक्ष दिएको बयानमा आफू निर्दोष भएको उल्लेख गरेका छन्।
लाछिानेले दिएको बयानमा भनिएको छ, ‘मर्नुअघि बनाएका २ वटा भिडियो हेर्दा उनले आफूलाई रवि लामिछाने समेतले मर्न बाध्य बनाएकोले आत्महत्या गरेको भनेका रहेछन्। सो कुरा उनले के कस्तो कारणले भनेका हुन् मलाई थाहा छैन।’
पढ्नुहोस् लामिछानेले प्रहरीमा दिएको बयान:
‘मृतक शालिकराम पुडासैनी करिब डेढ वर्ष पहिलो २–३ वटा सान्दर्भिक सूचना ल्याई हाम्रो कार्यालयमा आएका थिए। उनले राम्रो सूचना ल्याउन सक्ने सोचेर म र दीपक बोहोराले उनलाई न्युज २४ मा संवाददाताको रुपमा राख्यौं।
उनले पाउने सेवा सुविधाबारे मलाई केही थाहा थिएन। उनी निकै मिहिनेती, काममा खटिने र राम्रो सूचना ल्याउने गर्थे। कम्प्युटर चलाउन नजान्ने भएकाले उनले ल्याएका सूचनाहरुलाई युवराज कँडेलले पूरा गरी समाचार बनाई मलाई दिन्थे। करिब दुई महिना पहिले उनले माउन्टेन टेलिभिजनमा मासिक एक लाख रुपैयाँ तलब पाउने गरी मार्केटिङको काम पाएँ अब न्युज २४ छोडेँ भने। पछि उनले सो टिभीमा ‘मिसन न्युज’ भन्ने कार्यक्रम चलाउँछन् भन्ने थाहा पाउँदा मलाई किन ढाँटेको होला भन्ने लाग्यो।
घटनाको २–३ दिन पहिले हाम्रो क्यामेराम्यान अनिल ढुंगेलले हामी सबै कर्मचारीसँग भएको बेला शालिकरामको प्रेमिका पनि भएको र उनकी प्रेमिकाले शालिकरामबाट केही समस्या भोगिरहेको भनेर सुनाए। २०७६ साउन २० गते मेरो कार्यक्रम नभएकाले चाँडै सुतेँ। भोलिपल्ट ब्युँझिएर मोबाइल हेर्दा शालिकराम मृत्यु सम्बन्धका म्यासेजहरु २० गते राति नै आइसकेका रहेछन्।
उनले मर्नुअघि बनाएका २ वटा भिडियो हेर्दा उनले आफूलाई रवि लामिछाने समेतले मर्न बाध्य बनाएकोले आत्महत्या गरेको भनेका रहेछन्। सो कुरा उनले के कस्तो कारणले भनेका हुन् मलाई थाहा छैन।
उनले आफ्नो श्रीमती हुँदाहुँदै अस्मितालाई झुटो बोलेर प्रेम गरेको र पछि सबै कुरा थाहा पाएर टाढिन खोज्दा दुःख दिने, बाटो छेक्ने, मारिदिन्छु भनी डर देखाउनेजस्ता कार्यहरु गरेकाले अस्मिता मैले चलाउने सिधाकुरा जनतासँगमा गई रवि लामिछाने समेतलाई तिम्रोबारेमा भनी सर्वजनिक गरिदिने भनेका कारणले सोही कुरा साँचो ठानेर मसँग चित्त दुःखाई भिडियोमा समेत नाम लिई आत्महत्या गरेको हुनुपर्छ।
मैले उनीविरुद्ध कार्यक्रम बनाउँदैछु भनेर कसैले भनिदिएको समेत हुनसक्छ। शालिकरामले मलाई अत्यन्तै सम्मान गर्ने हुँदा मैले सम्मान गरेको व्यक्तिले उनकाविरुद्ध कार्यक्रम बनाउने भन्ने भ्रामक कुराले उनको मन दुःखेको हुनसक्छ। ममाथि आरोप लगाएको हुनसक्छ तर मैले उनलाई आत्महत्या गर्नेसम्मको दुःख दिएके छैन र दिनुपर्ने कुनै कारण पनि छैन। उनकी प्रेमिका भनिएकी अस्मितासँग देखभेट भएको पनि छैन। प्रहरीद्वारा पक्राउ परे पश्चात मात्र देखे, चिनेको हुँ।’
(जिल्ला सरकारी वकिलको कार्यालयले चितवनले २०७६ भदौ ८ गते बुझाएको मुद्दाको मिसिलबाट)
यो पनि पढ्नुहोस
यस्तो छ अस्मिता कार्कीले दिएको बयान, ‘न्यूज २४ टिभीबाट मलाई पटक–पटक फोन आयो’, यस्तो रहेछ रहस्य
अस्मिताको बयानको केही अंशः
‘करिब एक वर्ष पहिले फेसबुकमार्फत् शालिकराम पुडासैनीसँग चिनजान भएको हो। त्यसपछि हामीबीच माया प्रेम बस्यो। हामी फोन तथा म्यासेजमार्फत् अन्तरंगका कुराहरु गथ्र्यौं। उनी अलि शंकालु स्वभावका थिए। बेलाबेला मसँग झगडा गर्थे।
मलाई छोडेमा तिम्रो र मेरोबीच भएका कुराकानी म्यासेजहरु सार्वजनिक गरी तिम्रो बेइज्जत गरिदिन्छु भन्दै धम्काउथे। बिष खाएर मर्छु भनेर मलाई दुःख दिन्थे।
घटनाभन्दा करिब ७–८ दिन पहिले मैले उनी विवाहित भएको र मलाई झुटो बोलीरहेको थाहा पाएँ। त्यसपछि मैले उनलाई तिमीले मलाई फसायौ भनेँ, अब मेरो पिछा गर्न छाडीदेऊ भनेकी हुँ। उनले मलाई पटक–पटक फोन गरे। बाटो समेत छेकेर दुःख हैरानी दिए। मैले यो कुराको जानकारी शाकिरामले पहिले काम गर्ने न्युज २४ को ‘सिधाकुरा जनतासँग’का रवि लामिछाने, युवराज कँडेल समेतलाई भनेमा उनीहरुले शालिकरामलाई मेरो पिछा गर्नबाट छुटाई देलान् भन्ने सोचेर घटना हुनुभन्दा ४–५ दिन पहिले उक्त टेलिभिजनका क्यामेरापर्सन अनिल ढुंगेललाई फोन तथा म्यासेज गरी भेटेकी हुँ। भेटमा रवि लामिछाने समेतलाई सो कुराको जनकारी गराई दिनु भनेकी थिएँ। म र शालिकरामबीच आदान–प्रदान भएका म्यासेजका केही स्क्रिन सर्टहरु समेत त्यतिबेला मैले अनिललाई दिएकी हुँ।
अनिलले भने बमोजिम मैले न्युज २४ को कार्यालय अगाडि उभिएको मेरो फोटो खिचेर शालिकरामलाई पठाएको साँचो हो। अनिलले त्यतिबेला सो विषयमा रवि लामिछाने, युवराज कँडेल समेतलाई जानकारी गराएको बताएका थिए। उनले नै शालिकरामलाई फोन गरी केही कुरा गरेको समेत भनेका थिए।
केही म्यासेजका स्क्रिन सर्टहरु मृतकका फेसबुक साथीहरु कृष्णा थापा, प्रतिमा देवकोटा, बेबिका भण्डारी समेतलाई पठाएकी हुँ। सो पश्चात पनि शालिकरामले पटक–पटक फोन गरी हैरानी दिइरहे। तर मैले उनको फोनलाई वास्ता गरिन।
मिति २०७६ साउन २० गते राती करिब साढे १२ बजेतिर निज अनिल ढुंगेलले मलाई फोन तथा म्यासेज गरी शालिकरामसँग कुराकानी भएका कुनै पनि म्यासेज डिलिट नगर्नु भनेका थिए।
भोलिपल्ट मिति २०७६ साउन २१ गते बिहानको सिफ्टको ड्युटीमा हुँदा शालिकरामको मृत्युबारे सुनेर थाहा पाएँ। त्यसपछि करिब साढे दुई बजेतिर न्युज २४ का अनिल ढुंगेल र दिपक बोहरा समेतले मलाई पटक–पटक फोन गरी भेट्न र ५ मिनेटको भए पनि भिडियो बनाइदिन भनेका थिए। तर म उनीहरुलाई भेट्न गइनँ, भेट भएन।
शालिकारमको मोबाइलबाट बरामद भिडियोहरु हेरेँ, सुने। उक्त भिडियोमा उनले म, रवि लामिछाने र युवराज कँडेल समेत मिली योजना बनाई जालझेल गरी आत्महत्या गर्ने बाध्यात्मक स्थितिको सिर्जना गराए भनेका रहेछन्। तर मैले उनलाई यसरी आत्महत्या गर्ने सम्मको कुनै कार्य गरेको छैन। उनले मलाई झुटो आश्वसन दिई प्रेममा पारी फसाएको र वास्तविकता थाहा पाएपछि पिछा गर्न छाडीदेउ भन्दा समेत नमानेकाले सम्झाई देलान् भन्ने मनसायले मैले रवि लामिछाने समेतलाई भनि दिनु भनेर न्युज २४ टिभीका क्यामेराम्यान अनिल ढुंगेल समेतलाई केही म्यासेजका स्क्रिनसर्टहरु दिएकी हुँ।
शालिकरामसँग सम्बन्ध बिग्रिएपछि मैले अनिल ढुंगेललाई शालिकराम र मबीचका म्यासेज र अन्य कुराकानी सेयर गरिदिएकी हुँ। सो पश्चात न्युज २४ का अनिल ढुंगेल, युवराज कँडेल र रवि लामिछानले सो सम्बन्धमा सल्लाहगरी योजना बनाई शालिकराम हतोत्साही हुने किसिमले ब्याकमेल गरी केही कुरा भनेको वा केही कार्य गरेको हुनुपर्छ। सोही कारणबाट शालिकरामले आत्महत्या गरेको हुनुपर्छ।’
(जिल्ला सरकारी वकिलको कार्यालय चितवनले २०७६ भदौ ८ गते बुझाएको मुद्दाको मिसिलबाट)
