७ साउन, वीरेन्द्रनगर । सामाजिक मूल्यमान्यतामा परिवर्तन र परम्परागत हानिकारक अभ्यासबारे सोमबार सुर्खेतको वीरेन्द्रनगरमा अन्तरपुस्ता संवाद कार्यक्रमको आयोजना गरिएको छ । समाजमा व्याप्त रहेका सामाजिक कुरीतिलाई हटाउन युएन वुमनको आर्थिक सहयोग तथा द स्टोरी किचनको अयोजनामा कार्यक्रमको आयोजना गरिएको हो । कार्यक्रमका सहभागीले कर्णालीमा छाउपडी प्रथा, बालविवाह तथा लिङ्ग पहिचान गरेर भ्रूणहत्या गर्ने समस्या विकराल बन्दै गएको भन्दै यसको न्यूनीकरणमा लाग्नुपर्नेमा जोड दिए ।
सीमान्तकृत महिलाका लागि महिला संस्था वामका कार्यकारी निर्देशक मधुरानी ढकालले छोराको मोहले गर्भमा छोरीको भ्रूणहत्या गर्नाले महिलाको प्रजनन स्वास्थ्यमा नकारात्मक प्रभाव पारेको बताए । यस्ता महिलालाई पाठेघरलगायत अन्य समस्या विकराल अवस्थामा देखिने गरेको ढकालले बताए ।
त्यसैगरी समाजमा बालविवाहको पनि विकराल अवस्थामा रहेको अधिकारकर्मी एवं आवाज संस्थाका मनोविमर्शकर्ता निशा पौडेलले बताए । पछिल्लो समय बालविवाहको स्वरूप परिवर्तन भएको उनको भनाइ थियो । “पहिले बुबाआमाको करकापमा विवाह हुन्थ्यो”, उनले भने, “तर, अहिले बालबालिका आफैँ विवाह गर्ने प्रचलन बढेको छ ।” संस्थामा गत आर्थिक वर्ष २० बालविवाहका उजुरी दर्ता भए पनि कुनै पनि मुद्दाहरु कानूनी प्रक्रियामा नगएको उनको भनाइ थियो ।
प्रहरी महिला सेलका डिला विकले छोरा नभएको कारण दोस्रो विवाह गर्ने पुरुषको सङ्ख्या उल्लेख्य रहेको बताए । गत आर्थिक वर्षमा मात्र ४३ बहुविवाहका मुद्दा दर्ता भएको उनले बताए । सामाजिक विकास मन्त्रालयका विश्वणी जोशीले सामाजिक विकृतिविरुद्ध सरोकारवाला निकाय सशक्त भएर लाग्नुपर्नेमा जोड दिए । मन्त्रालयले यस विषयमा विभिन्न खालका कार्यक्रमको आयोजना गरेको भन्दै समन्वय गरेर अघि बढ्ने बताए ।
कार्यक्रममा इक्वल एक्सेसका अनु उपाध्यायले समाजका तीनवटै पुस्ताका व्यक्तिलाई एकै ठाउँमा राखेर कार्यक्रम गरेमा प्रभावकारी हुने भएकाले नै अन्तरपुस्ता संवाद कार्यक्रमको आयोजना गरिएको बताए ।
