नेपाल बालसाहित्य समाज (नेबासास) ले बालसाहित्यका विभिन्न विधामा योगदान पुर्याउने स्रष्टाहरूलाई प्रदान गरिने प्रतिष्ठित पुरस्कारहरूको घोषणा गरेको छ । २०८३ जेठ १० गते नेपाल बालसाहित्य समाजका अध्यक्ष एवं छनोट समितिका संयोजक श्री विजयराज आचार्यको अध्यक्षतामा बसेको बैठकले विभिन्न संस्थापकहरूबाट स्थापित पुरस्कारका लागि उपयुक्त स्रष्टाहरू छनोट गर्दै औपचारिक निर्णय सार्वजनिक गरेको हो ।
यस वर्ष घोषित पुरस्कारहरूमध्ये “नेबासास विमला–मोहन प्रवासी बालस्रष्टा पुरस्कार–२०८३” अमेरिकामा रहेर नेपाली भाषा, साहित्य तथा बालसिर्जनाको क्षेत्रमा सक्रिय बहुप्रतिभाशाली युवा स्रष्टा आभास अर्याललाई प्रदान गरिने निर्णय विशेष चर्चाको विषय बनेको छ । प्रवासमा बसेर पनि नेपाली भाषा, कला र साहित्यप्रति गहिरो लगाव राख्दै आएका आभास अर्यालले सानै उमेरदेखि आफ्नो सिर्जनात्मक प्रतिभाको परिचय दिँदै आएका छन् ।
आभास अर्याल केवल बालसाहित्य सिर्जनामा मात्र सीमित छैनन्, उनी विभिन्न साहित्यिक, सांस्कृतिक तथा सिर्जनात्मक गतिविधिहरूमा निरन्तर सक्रिय रहँदै आएका प्रतिभाशाली बाल व्यक्तित्वका रूपमा परिचित छन् । विशेषतः अन्तर्राष्ट्रिय नेपाली साहित्य समाज (अनेसास) अन्तर्गत “अनेसास बालतारा” मार्फत सञ्चालन गरिएका विभिन्न साहित्यिक तथा सिर्जनात्मक प्रतियोगिताहरूमा सहभागी भई उनले यसअघि पनि पुरस्कार तथा सम्मान प्राप्त गरिसकेका छन् । बालप्रतिभाका रूपमा उनले देखाएको लगन, सिर्जनशीलता र निरन्तरता प्रवासी नेपाली समुदायका लागि प्रेरणादायी मानिएको छ ।
प्रवासको व्यस्त परिवेशमा रहेर पनि नेपाली भाषा, साहित्य र संस्कृतिप्रति समर्पित रहनु आफैंमा उल्लेखनीय पक्ष मानिन्छ । त्यसमा पनि बालसाहित्यको क्षेत्रमा सक्रिय भई नेपाली मौलिकता, बालसंवेदना र सिर्जनात्मक चेतनालाई प्रवर्द्धन गर्नु आभास अर्यालको विशेष योगदानका रूपमा हेरिएको छ । नेबासासले उनलाई यो प्रतिष्ठित पुरस्कारका लागि छनोट गर्नु प्रवासमा रहेका नवप्रतिभाहरूलाई थप ऊर्जा र प्रेरणा दिने विश्वास गरिएको छ ।
यसैगरी, “नेबासास चुडा–चरण बालजीवनी पुरस्कार–२०८३” श्री प्रभात सापकोटालाई प्रदान गरिने भएको छ । बालजीवनी लेखनमार्फत बालपाठकलाई प्रेरणा र ज्ञान प्रदान गर्दै आएका सापकोटाको योगदानलाई सम्मानस्वरूप उक्त पुरस्कार प्रदान गर्ने निर्णय गरिएको हो ।
त्यस्तै “नेबासास तेजप्रतिभा बाल नियात्रा/बाल लोकवार्ता पुरस्कार–२०८३” प्रा.डा. चुडामणि बन्धुलाई प्रदान गरिने भएको छ । नेपाली लोकसंस्कृति, लोकवार्ता तथा नियात्रा साहित्यका क्षेत्रमा उहाँले पुर्याएको योगदानलाई कदर गर्दै नेबासासले उक्त पुरस्कार प्रदान गर्ने निर्णय गरेको जनाएको छ ।
“नेबासास मुकेश–जनक विज्ञान बालसाहित्य पुरस्कार–२०८३” श्री तेजप्रकाश श्रेष्ठलाई प्रदान गरिने भएको छ । बालपाठकमाझ विज्ञान चेतना विस्तार गर्न तथा विज्ञानलाई सरल र सिर्जनात्मक ढंगले प्रस्तुत गर्न उहाँले पुर्याएको योगदान उल्लेखनीय रहेको जनाइएको छ ।
यस्तै “नेबासास ध्रुव–सुशीला बालसाहित्य अनुसन्धान पुरस्कार–२०८३” डा. जयन्ती रुपाखेतीलाई प्रदान गरिने निर्णय गरिएको छ । बालसाहित्यको अध्ययन, अनुसन्धान तथा आलोचनात्मक क्षेत्रमा उहाँले पुर्याउनुभएको योगदानको उच्च मूल्यांकन गर्दै पुरस्कारका लागि छनोट गरिएको नेबासासले जनाएको छ ।
नेपाल बालसाहित्य समाजले हरेक वर्ष विभिन्न विधामा योगदान पुर्याउने स्रष्टा, अनुसन्धानकर्ता तथा बालप्रतिभाहरूलाई सम्मान गर्दै आएको छ । यसले नेपाली बालसाहित्यको विकास, प्रवर्द्धन तथा नयाँ पुस्तामा सिर्जनात्मक चेतना विस्तार गर्न महत्वपूर्ण भूमिका खेल्दै आएको साहित्यिक वृत्तमा विश्वास गरिन्छ ।
घोषित सम्पूर्ण पुरस्कारहरू २०८३ भदौ ७ गते विशेष समारोहका बीच समर्पण गरिने कार्यक्रम रहेको नेपाल बालसाहित्य समाजले जनाएको छ । उक्त समारोहमा देश तथा विदेशका साहित्यकार, बालसाहित्यकर्मी, स्रष्टा, अभिभावक तथा साहित्यप्रेमीहरूको उल्लेखनीय सहभागिता रहने अपेक्षा गरिएको छ ।
