वासिङ्टन डीसी । वासिङ्टन डीसीस्थित एक होटलमा आयोजित ह्वाइट हाउस करस्पोन्डेन्ट्स डिनरका क्रममा गोली चलेको आवाज सुनिएपछि अमेरिकी राष्ट्रपति डोनल्ड ट्रम्पलाई सेक्रेट सर्भिसका एजेन्टहरूले आकस्मिक उद्धार गरेका छन् ।
शनिबार साँझ वासिङ्टन हिल्टन होटलको बैंक्वेट हलमा यो वार्षिक कार्यक्रम भइरहेको बेला अचानक केही चिज पड्किएको जस्तो ठूलो आवाज आएपछि सुरक्षाकर्मीहरूले राष्ट्रपतिलाई सुरक्षित स्थानतर्फ लगेका हुन्।
घटनाको समयमा खिचिएको फुटेजमा ट्रम्प र अन्य सहभागीहरू टेबलमुनि लुकेको देखिन्छ। त्यतिबेला हलमा उपस्थित मानिसहरू तल बस्नुहोस्, तलै रहनुहोस् भन्दै चिच्याइरहेका थिए।
ठूलो आवाज सुनिएलगत्तै हतियारधारी सेक्रेट सर्भिस एजेन्टहरूले ट्रम्पलाई घेरेर तत्कालै त्यहाँबाट बाहिर निकालेका थिए। घटनापछि सुरक्षाकर्मीहरूले कार्यक्रम स्थललाई आफ्नो नियन्त्रणमा लिएका छन्। घटनास्थलमा रहेका एक सुरक्षा अधिकारीका अनुसार त्यहाँ सात देखि आठ गोली चलाइएको थियो।
सन्दिग्ध बन्दुकधारी मारिएको हो वा हिरासतमा लिइएको हो भन्ने बारेमा विवादास्पद रिपोर्टहरू आएका छन् । यद्यपि राष्ट्रपति ट्रम्पले केही समय अघि सामाजिक सञ्जालमार्फत बन्दुकधारी पक्राउ परेको उल्लेख गरेका छन् ।
