काठमाडौँ । राष्ट्रिय प्रजातन्त्र पार्टीका पूर्वअध्यक्ष तथा काठमाडौं ५ का उम्मेदवार कमल थापाले चुनावी अभियानमा घरदैलोमा जाँदा मतदाताले अब राजा नभई नहुने कुरा गरेको बताएका छन्।
आज काठमाडौंमा आयोजित कार्यक्रममा बोल्दै उनले भने, ‘जहाँ हामी भोट माग्न गएका छौं, अधिकांशले हामी हिन्दु राष्ट्र चाहन्छौँ भन्छन्। अधिकांंशले अब राजा नभई हुँदैन भन्छन्। केवल बुढापाकाले मात्रै होइन, हिन्दु राष्ट्र र राजसंस्थाको चाहना अहिले सबैभन्दा बढी युवाहरूले खोजिराखेका छन्।’
उनले चुनावको बेला भ्रष्ट दललाई नै भोट हाल्ने काम गर्न नहुने पनि बताए।
‘कमसेकम यो चुनावमा भ्रष्ट नेता र देशमा भ्रष्टाचारको महारोग भित्र्याउने पार्टीलाई भोट हाल्दैनौ भन्ने संकल्प गराऔँ। हामीले जनतालाई यही भनिराखेका छौँ। जनताले पनि सकारात्मक रेसपोन्स गरिरहेका छन्,’ उनले भने।
