२०८१ चैत २५, काठमाडौं ।
अमेरिकाको टेक्ससमा रहेको हेम सरिता पाठक फाउन्डेसनले आज “नयाँ शिक्षा ऐन जारी हुनुपर्ने” मागसहित राजधानीमा चलिरहेको शिक्षक आन्दोलनमा तेह्रथुमबाट सहभागी हुन आउनुभएका ३५ बढी सहभागी शिक्षकलाई स्वागत कार्यक्रमको आयोजना गर्यो ।
फाउन्डेसनका प्रमुख संरक्षक हेम पाठक र संरक्षक सरिता पाठक तथा अध्यक्ष जेनी पाठक र उपाध्यक्ष बोनस खनालको विशेष उपस्थितिमा डालो रेस्टुरेन्ट, अनामनगर, काठमाडौमा आयोजित सो कार्यक्रममा प्रमुख संरक्षक पाठकले शिक्षकको यस आन्दोलनमा फाउन्डेसनको ऐक्यबद्धता रहेको जिकिर गर्दै न्यायोचित मागको लागि जारी आन्दोलनले निर्णायक भूमिका खेल्नेमा आफू विश्वस्त रहेको उल्लेख गरे ।
साथै उनले तेह्रथुमका जेहेन्दार गरीब विद्यार्थीको लागि वार्षिक दुई लाखको छात्रवृत्ति प्रदान गर्ने घोषणा पनि गरे। प्रमुख संरक्षक पाठकले तेह्रथुमको एक विद्यालयलाई विशेष सहयोग गर्ने घोषणा गर्दै फाउन्डेसनको परिचय गराएका थिए ।
हेम सरिता पाठक फाउन्डेसन नेपालका अध्यक्ष राधेश्याम लेकालीले सहजीकरण गरेको सो कार्यक्रममा महासंघ जिल्ला समिति, तेह्रथुमका अध्यक्ष अविनारायण पराजुली, उपाध्यक्ष केदार कटुवाल, महिला उपाध्यक्ष डम्माकुमारी दाहाल, सदस्य हिमबहादुर थापा, जिल्ला समिति अध्यक्ष नेत्रप्रसाद कट्टेल, तेह्रथुम सरोकार मञ्च, काठमाडौंका अध्यक्ष डिल्ली ढुंगेल लगायतले आन्दोलनको महत्व, औचित्य र अवस्थाबारे बोलेका थिए । शिक्षक आन्दोलन सुरु भएको एक दशक नाघिसक्यो । यसबीच नेपाल सरकारले तीनपटक सम्झौता गरिसकेको छ । तर सम्झौता कार्यान्वयन भने गरेको छैन । व्यवस्था परिवर्तनमा शिक्षकहरुले वहन गरेको जिम्मेवारी गणतन्त्र आएपछि दलहरुले बिर्सिसकेका छन् ।
कार्यक्रममा फाउन्डेसनका कार्यसमितिका पदाधिकारी, सदस्य र तेह्रथुमबाट आउनु भएका शिक्षकहरुको उपस्थिति रहेको थियो । फाउन्डेसनले एक लाख राशिको “हेम-सरिता पाठक अन्तर्राष्ट्रिय सङ्गीत पुरस्कार २०८१”, एक लाखको “भ्रष्टाचार विरुद्धको कविता प्रतियोगिता २०८१” र दुई लाख राशिको “टंकप्रसाद रमादेवी पाठक पत्रकारिता पुरस्कार २०८१” आगामी २०८२ बैशाख १३ गते अर्पण गर्ने भएको छ । प्रतिष्ठानले नेपालमा स्कुल संचालन, विपन्नबर्गको लागि घर निर्माण र आयमुलक कार्यक्रमको लागि रकम अनुदानसमेत उपलब्ध गराउँदै आएको छ । यसैगरी प्रतिष्ठानले बाजुरा र झापा जिल्लाका विभिन्न क्षेत्रका अशक्त र असहायलगायत दुर्गम क्षेत्रका विद्यार्थीहरुलाई काठमाडौं ल्याएर पठनपाठन गराइरहेको छ ।
