देशकै नमूना सहकारीको रुपमा राजधानीमा संचालित ‘मनिप्लान्ट सेभिङ्ग एण्ड क्रेडिट को-अपरेटिभ लिमिटेड’मा नयाँ नेतृत्व चयन भएको छ । मनिप्लान्टको १४ औं साधारणसभाले इन्द्रमणि पोखरेलको अध्यक्षतामा नयाँ संचालक समिति निर्वाचित गरेको हो ।
मनिप्लान्टका नवनिर्वाचित अध्यक्ष पोखरेल नेपाल सरकारका पूर्व सहसचिव समेत हुन् । लेखा समूहमा रही उनले कोष तथा महालेखा नियन्त्रकको कार्यालय मातहत बिभिन्न कार्यालय र मन्त्रालयमा लेखा प्रमुखको जिम्मेवारी सफलतापूर्वक निर्वाह गरेका छन् । उनी गत वर्ष मात्र सरकारी सेवाबाट सेवा निवृत्त भएका हुन् ।
नव निर्वाचित संचालक समितिको उपाध्यक्षमा सुसन कर्माचार्य, सचिवमा उद्दिमबहादुर देवकोटा र कोषाध्यक्षमा राजकुमार सुवेदी निर्वाचित भएका संस्थापक सदस्य सुरेश न्यौपानेले जनाएका छन् । त्यस्तै, सदस्यहरूमा यामकुमार खड्का, धनबहादुर श्रेष्ठ, बालकृष्ण श्रेष्ठ, कृष्णसागर शर्मा, हेलेन घिमिरे, शान्ता पाण्डे घिमिरे र कमल गिरी निर्वाचित भएका बताइएको छ । साधारण सभाले नयाँ नेतृत्व सर्वसम्मत निर्वाचित गरेको हो ।
लेखा तथा सुपरिवेक्षण समितिमा भने किरण मास्केको संयोजकत्वमा राजेन्द्रप्रसाद घिमिरे तथा निलमणि दाहाल सदस्य रहेका छन् । यस अघि शिक्षासेवीसमेत रहेका सहकारीकर्मी सुदर्शन पराजुलीको नेतृत्वमा मनिप्लान्टले सदस्यहरुबीचको सहकार्यलाई उत्कृष्ट र उदाहरणीय बनाउदै सहकारी क्षेत्रमा देखिएको वर्तमान विषम परिस्थितिका बाबजुत संस्थाको साखलाई उचो बनाएको थियो । नवनिर्वाचित अध्यक्ष पोखरेलले बिगतको विरासतलाई कायम राख्दै सस्थालाई थप उन्नतीको दिशामा अग्रसर गराउने बताएका छन् ।
साधारण सभाको उद्घाटन सत्र भने बागमती प्रदेशका सहकारी रजिस्ट्रार राधाकृष्ण खतिवडाको प्रमुख आतिथ्यतामा सम्पन्न भएको थियो । साधारणसभामा सदस्यका परिवारबाट उत्कृष्ट शैक्षिक योग्यता हासिल गरेका, संस्थामा उत्कृष्ट योगदान गरेका, विभिन्न पदोन्नति र नियुक्ति भएका सदस्यहरूलाई पुरस्कार तथा सम्मान प्रदान गरिएको थियो।
उक्त अवसरमा कोटेश्वरको नरेफाँटस्थित लालिगुराँस बाटिका सेकेन्डरी स्कूलका विद्यार्थीले बिभिन्न सांस्कृतिक प्रस्तुति प्रदर्शन गरेका थिए ।
मनिप्लान्ट सेभिङ्ग एण्ड क्रेडिट को-अपरेटिभ लिमिटेडको कार्यालय काठमाडौको मीनभवनमा रहेको छ यसले आफ्ना सदस्यहरुका लागि हात्तीवनमा आवास योजना समेत सफलतापूर्वक सम्पन्न गरिसकेको छ । १ हजार १ सय ८२ सेयर सदस्य संख्या रहेको संस्थाको पछिल्लो आर्थिक वर्ष २०७९/०८० को कुल वासलात १ अर्ब २१ करोड १७ लाख ३६ हजार ८ सय ५२ रुपैयाँ रहेको कार्यकारी प्रमुख ओमबहादुर बस्नेतले बताएका छन् ।