बैशाख २१, काठमाडौं । प्रतिपक्षी दल नेकपा (एमाले)बाट काठमाडौं महानगर मेयरका उम्मेदवार केशव स्थापितको बेलगामको बोलीले एमालेका उम्मेदवारहरूलाई फसाद परेको छ । विभिन्न सार्वजनिक कार्यक्रममा स्थापितले मनमौजी बोल्न थालेपछि पार्टीका अन्य उम्मेदवारलाई फसाद परेको हो ।
वैशाख ३० मा हुने स्थानीय तह निर्वाचनमा एमालेका उम्मेदवारले अब सार्वजनिक कार्यक्रम र सञ्चारमाध्यममा बोल्न पाउने छैनन् । स्थापितको बोलीकै कारण पार्टीका अरू उम्मेदवारहरूलाई बाधा हुने भन्दै सार्वजनिक कार्यक्रम र सञ्चारमाध्यममा बोल्नुपूर्व अनुमति लिनुपर्ने भएको छ ।
त्यसका लागि एमालेका उम्मेदवारहरूले पार्टीको निर्वाचन परिचालन कमिटीको अनुमति लिएर बोल्न पाउने छन् । अन्यथा उक्त कमिटीको अनुमतिबेगर मनमौजी (आफूखुसी) बोल्न नपाइने भएको छ । खासगरी काठमाडौं महानगर मेयरका उम्मेदवार स्थापित एकपछि अर्को विवादमा परेर पार्टीलाई नै बाधा हुने भन्दै एमालेले यस्तो नीति तय गरेको हो ।
आजको नेपाल समाचारपत्रमा यो खबर छापिएको छ ।
