बैशाख १९ ,काठमाडौं । निर्वाचन आयोगले स्थानीय तहका उम्मेदवारहरुले निर्वाचन प्रचार प्रसारमा सवारीसाधन प्रयोग गर्न अनुमतिपत्र लिनु पर्ने सम्बन्धि सवारीसाधन प्रयोग निर्देशिका सार्वजनिक गरेको छ।
निर्वाचन आचारसंहिता कार्यान्वयन कार्यविधि, २०७९ का अनुसार उम्मेदवारले निर्वाचन अधिकृतबाट अनुमतिपत्र लिएर मात्र निर्वाचन प्रचार प्रसारको लागि सवारीसाधन प्रयोग गर्न पाउँछन्।
कार्यविधिअनुसार महानगरपालिका तथा उपमहानगरपालिकाका प्रमुख वा उप्रमुख वा वडाध्यक्ष र वडा सदस्यले बढीमा दुई ओटा दुई पाङग्रे वा तीनपाङग्रे वा चारपाङ्ग्रे विद्युतीय तथा यान्त्रिक शक्तिबाट चल्ने हलुका सवारीसाधन प्रयोग गर्न पाउँछन्।
नगरपालिकाका प्रमुख, उपप्रमुख, गाउँपालिकाका अध्यक्ष, उपाध्यक्ष, वडाध्यक्ष र वडा सदस्यले एउटा दुई पाङग्रे वा तीनपाङग्रे वा चारपाङग्रे विद्युतीय तथा यान्त्रिक शक्तिबाट चल्ने हलुका सवारीसाधन र दुई ओटासम्म घोडा प्रयोग गर्न सक्छन्।
सवारीसाधन प्रयोगको लागि उम्मेदवारले निर्वाचन अधिकृतलाई निवदेन दिनुपर्ने र अधिकृतले निवेदनको आधारमा उल्लिखित संख्यामा नबढ्ने गरी सवारीसाधन प्रयोग गर्ने अनुमतिपत्र जारी गरिने आयोगले जनाएको छ ।
