दोहा । वैदेशिक रोजगारीका क्रममा साउदी अरब पुगेका २४ नेपाली युवा अलपत्र परेका छन् । भिसाको म्याद सकिएपछि उनीहरू अलपत्र परेका हुन् ।
साउदीको टोपाज गल्फ कम्पनीले अकामा (आइडी) नबई काम गरेको पारिश्रमिक नदिई कामबाट निकालेपछि २४ नेपाली अलपत्र परेको पीडितमध्येका एक ओखलढुंगाका निसान थापा मगरले बताए ।
‘हाम्रो कम्पनीले समयमा पारिश्रमिक नदिने, अकामा (आइडी) कार्ड पनि नबनाई दिने र करार अवधि सकिएपछि घर पनि नपठाउएको कारण हामीले साउदी लेवरकोर्टमा उजुरी गरेका थियौँ’, निसानले खबरहबसँग भने, ‘कोर्टले हाम्रो पक्षमा फैसला गरेर कम्पनीलाई एक महिना भित्र बाँकी पारिश्रमिक तथा एक्जिट भिसा र टिकट दिनु भनेको छ हेरौँ कम्पनीले के गर्छ !’
कोर्टले हाम्रो पक्षमा फैसला सुनाएपछि कम्पनीले आफूहरु बस्ने कोठाबाटसमेत निकाली दिएको उनले बताए । अहिले त्यहाँको जुबेल भन्ने ठाउँमा एक महिनादेखि कोठा भाडामा लिएर बसिरहेको उनले जानकारी दिए ।
अलपत्र परेका अर्का नेपाली नारायण परियारले भने, ‘पहिले कम्पनी राम्रो थियो । अहिले झन्डै दुई वर्ष भयो कम्पनीले हामीलाई दु:ख दिएको । साउदीस्थित नेपाली दूतावासले पैसा लिने कोसिस गर्नु एक्जिट भिसाको लागि हामी सहयोग गर्छौ भनेको छ तर अहिलेसम्म केही गरेको छैन ।’
पछिल्लो समयमा दूतावास र आफूहरूलाई पठाउने गल्फ इस्काइ म्यानपावरले पनि उद्धारको पहल गर्ने बचन दिएकाले अहिले कोठामै बस्न बाध्य भएको उनले बताए ।
समस्यामा परेका उनीहरूलाई केही नेपाली व्यक्तिगत रुपमा सहयोग गरेपनि दूतावास मुखदर्शक बनेको पीडितको गुनासो छ । यता दूतावासले भने पीडितको समस्या समाधानको प्रयास जारी रहेको जनाएको छ । एक्जिट भिसाको पहल भैरहेको दूतावासले जनाएको छ ।
यस्तै साउदीको जेद्धामा पनि एक्जिट भिसा नपाएर करिव २२ नेपाली अलपत्र परेको जानकारी आएको छ । पछिल्लो समयमा कम्पनीले कोरोना महामारीको कारण देखाउँदै कामदारलाई बिना पारिश्रमिक कम्पनीबाट निकाल्ने तथा घर पठाउने गरेको गुनासो बढ्न थालेको छ।
यस्ता समस्या दिनप्रतिदिन बढ्न थालेको भन्दै नेपाली कामदारको अवस्था बुझ्न र समाधानको पहल गर्न पीडित कामदारले दूतावासलाई आग्रह गरेका छन् ।
यी हुन भिसा सकिएर अलपत्र २४ नेपाली
१ नारायण परिया
२ निसान थापामगर
३ विरबहादुर तामाङ
४ विष्णुबहादुर सुनार
५ लोकमान चौधरी
६ मंगलप्रसाद कुर्मी
७ संग्राम राई
८ कालेसिंह तामाङ
९ टेकेन्द्र घर्ती
१० कुमार खत्री
११ सूर्य अधिकारी
१२ राजेन्द्र राई
१३ रामबहादुर नेपाली
१४ तिलकराम चौधरी
१५ जंगली चौधरी
१६ रामकुमार चौधरी
१७ हर्निबहादुर चौधरी
१८ भरत राई
१९ अमर चौधरी
२० नेत्र बीसी
२१ लोकबहादुर थारु
२२ विष्णुबहादुर ठकुरी
२३ रजद मिया
२४ रोमन राई
