काठमाडौँ । प्रधानमन्त्री केपी शर्मा ओलीले सर्वोच्च अदालतले संसद पुनस्र्थापना गरे आन्दोलन गर्ने धम्की दिएका छन् । शनिवार विराटनगरमा नेकपाको ओली समूहले आयोजना गरेको कार्यक्रममा बोल्दै प्रम ओलीले सो धम्की दिएका हुन् ।
यसअघि नेकपाका प्रचण्ड–माधव समूहलाई अदालतलाई धम्की नदिन र स्वतन्त्र निर्णय गर्न दिन भन्दै तर्क दिने गरेका प्रम ओलीले शनिवार भने आफै यस्तो धम्की दिए । उनले यसअघि प्रचण्ड–माधव समूहले थालेको आन्दोलन अर्थहीन भएको बताउँदै ‘भोटी मैलो नबनाउन’ ब्यङ्ग्य समेत गर्ने गरेका थिए । शनिवार प्रम ओलीले सर्वोच्च अदालतका न्यायाधिशहरुलाई सडकमा आफूहरुले उतारेका मान्छे हेर्न पनि धम्की दिए । देशभर आफ्नो पक्षमा मान्छे उत्रिएको र संसद पुनस्र्थापना गरे अझै मान्छे उतार्ने उनको संकेत थियो ।
अनौठो यो भयो कि शनिवार प्रम ओलीले अदालतमा ‘सेटिङ’को प्रसंग उप्काए । यसअघि ओलीका मान्छेहरुले अदालत र निर्वाचन आयोग लगायतका सबै संवैधानिक अंगहरुमा प्रधानमन्त्रीले सेटिङ मिलाएकोले उनले गरेका सबै निर्णय सदर हुने तर्क गर्ने गरेका थिए । त्यसलाई प्रचण्ड–माधव समूहले त्यस्तो सेटिङले काम नगर्ने र त्यसरी सेटिङबाट कुनै निर्णय आए त्यसका विरुद्ध कडा आन्दोलनको चेतावनी दिने गरेका थिए । तर, शनिवार भने प्रम ओलीले नै अदालतमाथि त्यस्तो आरोपको संकेत गरे । उनले अदालतमा सेटिङ मिलाएर संसद पुनस्र्थापना गरिए आफूले आन्दोलन गर्ने बताए ।
प्रधानमन्त्री ओलीले प्रतिनिधिसभा पुनस्र्थापित भए सकार ढाल्ने र बनाउने तथा सांसद किनबेच हुने फाहोरी खेल सुरु हुने बताए । ‘प्रतिनिधिसभा कथं कदाचित पुनस्र्थापना हुने भयो भने के हुन्छ भन्दा अब बहुमतको सरकार रहेन, बहुमतको सरकार रहँदैन,’ उनले भने, ‘त्यसो भएपछि अनि विभिन्न गठजोड गर्नका लागि फेरि उही सांसद किनबेच, दलहरूका बीच मोलतोल, फेरि समीकरण, फेरि सरकार ढलाऊ, फेरि सरकार बनाऊ । यही खेलमा आगामी डेढ दुई वर्ष त्यसैमा समाप्त हुन्छ र देश अगाडि बढ्न सक्दैन ।’
उनले अदालतबाट प्रतिनिधिसभा पुनस्र्थापित भए लोकतन्त्र समाप्त हुने र संविधान कार्यान्वयन नहुने ठोकुवा गरे । उनले भने, ‘त्यो फोहोरी खेलले, संसदीय नराकारात्मक तमासाले लोकतन्त्र समाप्त हुन्छ र संविधान कार्यान्वयन हुन सक्दैन । यसर्थ, ताजा जनादेशमा जानुको विकल्प थिएन, ताजा जनादेशमा गइएको छ ।’
प्रधानमन्त्री ओलीले ‘चुनाव गराउन प्रतिनिधिसभा भङ्ग गरेको होइन’ भन्ने आरोपको जमेर खण्डन गरे । उनले अनुचित खालका क्रियाकलापको बाटोबाट कोही प्रधानमन्त्री हुन खोज्ने, कोही अध्यक्ष हुन खोज्नेहरूले भ्रम फैलाएको आरोप लगाए । उनले आजको राजनीति र आजको देशको आवश्यकता चुनाव नै हो भन्ने दाबी गरे ।
प्रधानमन्त्रीले कुनै भ्रममा नपरेर, अन्योलमा नपरेर चुनावको तयारीमा जुट्न सभामा आह्वान गरे । उनले २०७८ साल वैशाख १७ गते र २७ गते प्रतिनिधिसभामा निर्वाचन हुने ठोकुवा गरे ।
ओलीप्रति सभामा नेम्वाङको चर्को चाप्लुसी
विराटनगरको सभामा नेकपा ओली समूहका नेता तथा पूर्व सभामुख सुवासचन्द्र नेम्वाङले प्रम ओलीप्रति चर्को चाप्लुसी गरेको देखियो । उनी मन्तव्य सुरु गर्दादेखि नै लगातार ओलीको भव्य गुनगान गाउँदै थिए । उनले ‘प्रधानमन्त्रीज्यूको उज्यालो अनुहार छ’, उहाँको भव्य र ‘गर्विलो मन्तव्य आउँदैछ’ जस्ता शब्दहरु भरेर गुनगानका साथ आफ्नो भाषण सुरु गरे । भाषण सुन्नेहरु नेम्वाङले किन यति चर्को चाप्लुसी गरेका होलान भनेर कानेखुसी समेत गरिरहेका थिए । नेम्वाङले अन्तिमसम्म पनि ओलीको गुनगान गाए ।
जनसभा’ मा दोस्रो वक्ताको रूपमा खडा भएका स्थायी समिति सदस्य सुवासचन्द्र नेम्वाङले आजको जनसभामा प्रधानमन्त्रीले कुनै ‘महत्वपूर्ण’ सूचना सुनाउन लागेको बताए ।
नेम्वाङले विराटनगर एअरपोर्टमा प्रधानमन्त्रीको स्वागत गर्न गएको बेला आफूले यस्तो छनक पाएको बताए । उनले आफ्नो मन्तव्यको सुरुमै प्रधानमन्त्रीको अनुहारको कान्तिको बयान गर्दै ‘केही समाचार सुनाउँजस्तो’ अनुहार देखेको बताए ।
‘प्रधानमन्त्रीज्यू विराटनगर एअरपोर्टमा उत्रेर हामीतिर आउँदै गर्दा सदा झैँ उज्यालो अनुहार, आज चाहिँ थप, तपाईं हामीलाई केही समाचार सुनाऊँ सुनाऊँजस्तो अनुहार तर प्वाक्कै भनी चाहिँ हाल्नु भएन,’ उनले भने, ‘तर यो सभामा उपस्थित भएर तपाईं हामीलाई कुनै सूचना सुनाउन गइराख्नुभएको छ । के छ मलाई थाहा छैन तर पक्कै पनि उहाँको भव्य र गर्विलो मन्तव्यका साथ कुनै महत्वपूर्ण सूचना हामीलाई सुनाउँदै हुनुहुन्छ भन्ने मलाई लाग्छ ।’
नेम्वाङले भने झैँ प्रधानमन्त्री केपी शर्मा ओलीले एउटा निकै ‘महत्वपूर्ण’ सूचना सुनाए । उनको सूचना थियो— सर्वोच्च अदालतले प्रतिनिधिसभा विघटन गर्ने आफ्नो निर्णय बदर गरे आन्दोलन हुनेछ, देशभरिका सभा हेरेर विघटनको निर्णय सदर गर्नुपर्छ ।
