एजेन्सी । पछिल्लाे समय भारत विश्वकै काेराेना हटस्पट बनेकाे छ । पछिल्लाे समय भारतमा एकै दिन साढे ७८ हजारभन्दा बढी काेराेना संक्रमित भेटिएपछि भारत खराव अवस्थामा पुगेकाे हाे । एकै दिन नयाँ संक्रमित भेटिएकाे याे विश्वकै ठूलाे संख्या हाे । यति ठूलाे संख्यामा अहिलेसम्म कुनै देशमा पनि एकै दिनमा नयाँ संक्रमित भेटिएका थिएनन ।
आइतबार भारतमा २४ घण्टाभित्र ७८ हजार ७ सय ६१ जनामा काेराेना संक्रमण भएकाे पुष्टि भएकाे छ । विश्वको कुनै देशमा एकै दिन यति धेरैमा कोरोना भाइरस संक्रमण पहिचान भएको यो पहिलो घटना हो ।
यसअघि अमेरिकाले गत जुन १६ मा २४ घण्टाभित्र ७७ हजार २ सय ९९ जनामा संक्रमण देखिएको जानकारी दिएको थियो । तर यो खराब रेकर्ड भारतमा ब्रेक भएको छ । विश्वको दोस्रो ठूलो जनसंख्या भारतमा अहिले ३५ लाख ४० हजारभन्दा धेरैमा संक्रमण देखिइसकेको छ । अति प्रभावित देशको सूचीमा भारत तेस्रो हो । पहिलो स्थानमा रहेको अमेरिकामा ६१ लाखभन्दा धेरैमा संक्रमण देखिएको छ भने ब्राजिलमा ३८ लाख ४६ हजारभन्दा धेरैमा संक्रमण पुष्टि भइसकेको छ ।
यद्यपि, पछिल्लो एक सातादेखि दैनिक संक्रमित हुने नयाँ व्यक्तिको संख्या अमेरिका र ब्राजिलभन्दा भारतमा धेरै छ । अहिलेसम्म भारतमा ६३ हजार ४ सय ९८ जनाले कोरोनाका कारण ज्यान गुमाइसकेका छन् । भारतका सबैभन्दा धनी राज्य महाराष्ट्रमा पछिल्लो २४ घण्टामा ३ सय ३१ जनाले ज्यान गुमाएका छन् भने कर्नाटकमा १ सय ३६ जनाको मृत्यु भएको छ ।
