काठमाडौँ । काठमाडाैं जिल्ला प्रशासन कार्यालयले अाजदेखि विभिन्न गतिविधिमाथि राेक लगाएकाे छ । काेराेना भाइरसकाे संक्रमण बढ्दै गएपछि प्रशासनले भिडभाड बढाउने र अन्य गतिविधिमाथि कडा प्रतिबन्ध लगाउने अादेश दिएकाे हाे ।
सङ्क्रमण रोकथाम तथा नियन्त्रणका लागि नेपाल सरकारले जारी गरेको स्वास्थ्य मापदण्डलाई कडाइका साथ पालना गराउन स्थानीय प्रशासन ऐन २०२८ को अधिकार प्रयोग गरी प्रमुख जिल्ला अधिकारी जनकराज दाहालले निश्चित गतिविधि निषेधको आदेश जारी गरेका हुन् ।
आदेश विपरीतका काम भएमा ऐन बमोजिम कारवाही गरिने जनाइएको छ । जारी निषेधित गतिबिधि अन्तर्गत आजदेखि खुला स्थानमा भेला हुन पाइने छैन भने भीडभाड र जुलुस, भीडभाड हुने गतिविधि, जात्रा महोत्सव पनि गर्न पाइने छैन ।
यस्तै पूजा तथा धार्मिक कार्यक्रम, उद्योग व्यापार व्यवसायअन्तर्गतका स्वास्थ्य मापदण्ड विपरीतका क्रियाकलाप, चाडपर्व तथा धार्मिक कार्यका लागि हुने जमघट गर्न पनि निषेध गरिएको आदेशमा जनाइएको छ ।
यस्तै शैक्षिक संस्था सञ्चालन गर्न रोक लगाइएको छ भने सबै प्रकारका सभा, गोष्ठी, तालीम, सेमिनार, सिनेमा हल, पार्टी, प्यालेस, मनोरञ्जनस्थल, शैलुन, व्यूटी पार्लर, स्पा, स्वीमिङ पुल, जीमखाना, समूहमा खेलिने खेल, पुस्तकालय, सङ्ग्रहायल, चिडियाखाना सञ्चालन गर्न पनि निषेध गरिएको छ ।
फुटपाथ, खुला ठाउँ, ठेलागाडा वा साइकलमा सञ्चालन हुने विभिन्न व्यवसाय तथा कवाड सङ्कलन, उद्योग व्यवसायका लागि स्वास्थ्य मापदण्ड विपरीत कामदार ओसारपसार गर्न, टेक वे बाहेकका होटल रेष्टुराँ सञ्चालन गर्न निषेध गरिएको प्रजिअ दाहालद्वारा जारी आदेशमा उल्लेख छ ।
आज बिहानदेखि लागू भएको उक्त आदेश आगामी भदौ १५ गतेसम्म जारी रहने जनाइएको छ ।