बेझाड, ११ असोज । गरीब, विपन्न परिवारको उपचारमा आर्थिक सहयोगार्थ पाल्पाको रामपुर नगरपालिकामा भेटिपेटिकाको शुरुवात गरिएकोे छ । मृत्यु संस्कारमा भेटघाटको क्रममा लगिने फलफूुल, चामल, घ्यू जस्ता कार्यको अन्त्य गरी वडा नं– ७ को कार्यालयले भेटिपेटिकाको शुरु गरेकोे हो ।
मृत्यु संस्कारमा लगिने फलफूल, चामल, घ्यूकोे ठाउँमा रकम सङ्कलन गरी गरीब तथा विपन्नको उपचारमा थोरै भए पनि आर्थिक सहयोग पुगोस् भन्ने उद्देश्यले यस कार्यको शुरु गरिएको वडाध्यक्ष तीर्थप्रसाद पङ्गेनीले बताए । यस कार्यको थालनी वडा र नगरमा मात्र सीमित नरही देशव्यापी रुपमा भएको खण्डमा सामाजिक संस्कारमा गरिने फजुलखर्च सही ठाउँमा सदुपयोग हुने स्थानीय दोवराज तिवारी बताउछन् ।
आर्थिक अभावमा उपचार गर्न नसक्दा धेरैले अकालमा ज्यान गुमाउनु परेको छ । यस कार्यले थोरै भए पनि उपचारमा केही सहयोग पुग्नेछ । पछिल्लो समय काजकिरिया खर्चबापतको रकम कटौती गरेर सामाजिक क्षेत्रमा सहयोग गर्ने क्रम पनि विस्तारै बढ्न थालेको छ ।
