राष्ट्रिय परीक्षा बोर्डले कक्षा ११ को परीक्षाफल प्रकाशनको अन्तिम तयारी गरेको छ । भोली मंगलवार सम्भव नभए बुधवारसम्ममा परीक्षाफल प्रकाशन गरिने बताइएको छ ।
बोर्ड श्रोतका अनुसार अहिलेसम्म बोर्ड बैठक भने बोलाइएको छैन । बोर्ड बैठकपछि परीक्षाफल प्रकाशन गर्ने परम्परा रही आएको छ ।
बोर्डले गत वर्ष झैँ यसपटक पनि सबै समूहको एकसाथ परीक्षाफल प्रकाशनको तयारी गरेको छ । बोर्डको परीक्षा नियन्त्रकको जिम्मेवारी कृष्ण शर्माले पाए संगै बोर्डले सबै विषयको एकसाथ परीक्षाफल प्रकाशन गर्दै आएको छ ।
करिब ४ लाख परीक्षार्थी सम्मिलित परीक्षा यसै वर्षको बैशाख अन्तिममा शुरु भै जेठ १४ गते सम्पन्न भएको थियो ।
