सोलुखुम्बु, २८ भदौ । सोलुखुम्बुको खुम्बुपासाङल्हामु गाउँपालिका–२ मा रहेको सुर्के खोलामा आएको बाढीले फलामे पुल बगाउँदा आवतजावतमा समस्या भएको छ । बिहीबार बेलुका अविरल वर्षापछि आएको बाढीले पुल बगाउँदा आवातजावत ठप्प भएको हो ।
पर्यटकीय मौसम भएकाले यात्रुको चाप बढी भएपछि प्रहरी र स्थानीयले फड्के पुल बनाएर सामान्य आवतजावत सञ्चालन गरेका छन् । तर, खच्चड र घोडाको लागि पूर्णरुपमा आवगमन बन्द भएको स्थानीय याङ्जी शेर्पाले जानकारी दिए । यति बेला दैनिक खरिखोलाबाट सयौँ विदेशी तथा स्वदेशी पर्यटक सुर्के हुँदै लुक्ला जान्छन् । पर्यटकको लागि आवश्यक खाद्यान्नको सामान तथा लत्ताकपडा खच्चड र घोडाको प्रयोग गरी ढुवानी गरिन्छ । सडकको पहुँच नभएका कारण त्यस क्षेत्रमा सामान ढुवानीका लागि भरपर्दो साधन खच्चड, घोडा नै । तीनै खच्चड र घोडा हिडाउन नसक्ने भएपछि थप समस्या भएको स्थानीयले बताएका छन् ।
खुम्बु क्षेत्रका लागि खच्चडको प्रयोग गरी सामान ढुवानी गरिन्छ तर । बाटो अवरुद्ध भएपछि समस्या हुने लुक्लाका व्यवसायी फिन्जो शेर्पाले बताए । शेर्पाले स्थानीय तहलाई तत्कालै बैकल्पिक व्यवस्था गर्न माग गरे ।
यसैबीच, बाढिले सोही स्थानको सुर्केखोला पेल्ट्रीकसेटको पाइप र ट्याङ्की बगाएको छ । बाढीले विद्युत्को पाइप र ट्याङ्की बगाउँदा ५० घरमा विद्युत् आपूर्ति बन्द भएको जिल्ला प्रहरी कार्यालय सोलुखुम्बुका प्रहरी निरीक्षक उत्तम कार्कीले जानकारी दिए । विद्युत् अवरुद्ध हुँदा मोबाइल चार्ज गर्नदेखि रेडियो टेलिभिजन हेर्न नपाएको स्थानीयले बताएका छन् ।
साइकलयात्री जितकुमार साह आधारशिविरमा
साइकलयात्री जितकुमार शाह सगरमाथा आधारशिविर पुगेका छन् । भदौ ९ गते जनकपुरबाट यात्रा शुरु गरेका शाह शुक्रबार बिहान नौ बजे १९ दिनमा सगरमाथा आधारशिविर पुगेका हुन् ।
उनी गत बिहीबार सल्लेरी आइपुगेका थिए । शाह काठमाडौँ, दोलखा, उदयपुर, ओखलढुङ्गा हुँदै सोलुखुम्बु आएका हुन् । नेपाल भ्रमण वर्ष २०२० लाई सफल पार्न यात्रा गरेको शाहको भनाइ छ । ‘तराई पहाड हिमाल हाम्रो मातृभुमि नेपाल’ भन्ने मूल नारासाथ नेपालको झण्डासहित सोलुखुम्बु आइपुगेका शाहले आफ्नो यो यात्राले नेपाल भ्रमण वर्षलाई सफल पार्न सहयोग पुग्ने दाबी गरे । आगामी वैशाखमा ३१ वर्षीय शाहले साइकलसहित सगरमाथा आरोहण गर्ने बताए ।
