भक्तपुर, १९ भदौ। भक्तपुरको मेधा माध्यमिक विद्यालय देशभरकै उत्कृष्ट विद्यालय बन्न सफल भएको छ ।
शिक्षा, विज्ञान तथा प्रविधि मन्त्रालयको वार्षिक मूल्याङ्कनमा भक्तपुर नगरपालिका तेखापुखुमा रहेको मेधा मावि सामुदायिक विद्यालयतर्फ देशभरकै उत्कृष्ट विद्यालय बन्न सफल भएको हो ।
मन्त्रालयले ४० औँ राष्ट्रिय शिक्षा दिवस तथा ५३ औँ अन्तरराष्ट्रिय साक्षरता दिवसका दिन मेधा माविलाई पुरस्कृत गर्ने शिक्षा मन्त्रालय शिक्षा तथा मानव श्रोत विकास केन्द्र सानोठिमीले जानकारी दिएको छ ।
मन्त्रालयले १० कक्षाको परीक्षाफल र ९ कक्षाको विद्यार्थी रजिष्ट्रेशनको आधारमा गरेको मूल्याङ्कनमा मेधाले ९०।१ नम्बर प्राप्त गर्दै पहिलो विद्यालय बन्न पुगेको केन्द्रले जानकारी दिएको छ ।
त्यस्तै गुल्मीस्थित रेसुङ्गा माविले ८६।३४ नम्बर ल्याएर दोस्रो र काठमाडौँको बालाजुस्थित तरुण मावि ८६।३२ नम्बरसहित तेस्रो भएको छ । संस्थागततर्फ भने रिलायन्स इण्टरनेशनल एकेडेमी कपन काठमाडौं प्रथम, नेपाल प्रहरी मावि साँगा काभ्रे दोस्रो र भ्याली भ्यू इङ्लिस स्कूल नयाँबानेश्वर काठमाडौँ तेस्रो भएको छ ।
माध्यमिक शिक्षा उत्तीर्ण परीक्षाअन्तर्गत १२ कक्षासम्म सञ्चालित विद्यालयबाट सामुदायिकतर्फ कास्की पोखराको अमरसिंह मावि प्रथम, मोरङ इन्द्रपुरको सुकुना मावि द्धितीय र पर्वत फलेवासको भवानी विद्यापीठ तृतीय भएका छन् ।
संस्थागततर्फ क्रमशः कास्कीकै एसओसएस हर्मन माईनर प्रथम, काभ्रे साँगाको नेपाल प्रहरी मावि द्धितीय र सेण्ट जेभियर्स कलेज माइतीघर काठमाडौँ तृतीय भएका छन् ।
